Rasmiy ayblovga ko’ra esa Ubaydullayevning “vahobiylik” oqimiga aloqasi bor.

Alisher Ubaydullayevning otasi va advokati Omon Ubaydullayevning aytishicha, o’g’lining Londonda norozilik aksiyasida qatnashgani haqidagi ma’lumot jinoiy ishda asosiy o’rinda turadi.

“Andijon voqealari bo’yicha Angliyadagi elchixonada prezident siyosatiga qarshi norozilik aksiyasida qatnashdi deb epizod qo’yilgan. Vaholanki, guvohlar buni rad qilgan bo’lsa ham”, - deydi Omon Ubaydullayev.

Alisher Ubaydullayev 5 yillik qamoq jazosiga hukm qilingan. Hukm ustidan shikoyat arizasi berilgan. Uning advokatiga ko`ra, Alisherning vahobiylarga qo’shilgani haqidagi da’vo asossiz.

“Gumondorlani birortasi so’roq qilinmagan. O’g’limni jazolayapti, tergovchi “halqa”ni o’ylab topib, vahobiylik tizimi deb jinoiy ish qo’zg’atgan. Bu tergov davomida guvohlar ko’rsatmalari bilan to’liq rad qilindi”, - deydi advokat Ubaydullayev.

“Angliyaliklar, maxsus xizmat vakillari O`zbekiston elchixonasi oldiga borib norozilik o`tkazishga da’vat qilishdi deb yozib berasan degan. O’g’lim yozib bermagan. Uni turmada urishgan.”

“Ezgulik” inson huquqlari jamiyatining mazkur ish yuzasidan bayonotida tergov ishi bir yoqlama, qiynoqlar ostida o’tgani, sudda jamoatchilik vakillari qatnashishiga ruxsat berilmagani ta’kidlanadi.

“U 2005 yil may oyida Londonda O’zbekiston elchixonasi oldida o’tgan norozilik aksiyasida qatnashganlikda gumon qilingan. O’zbekistonga qaytgach, Andijon voqealari yuzasidan tergov ishlarida gumondor sifatida qamoqqa olingan. Davlatga qarshi adabiyotlar tarqatishda ayblangan. Sudi bir necha marta qoldirildi. Yaqinda hech kimga bildirmasdan hukm o’qilibdi”, - deydi “Ezgulik” vakili Abdurahmon Tashanov.

Huquq himoyachisi Surat Ikromov so’zlariga ko’ra, ayniqsa diniy e’tiqod yuzasidan tergov ishlarida qiynoqlarni qo’llash an’anaga kirgan. Qiynoqlar oqibatida mahbuslar vafot etmoqda.

O’zbekistonda konstitusiya munosabati bilan e’lon qilingan amnistiya qo’llanila boshlandi. Biroq faollar nazarida diniy e’tiqodi uchun qamalganlar hamda huquq himoyachilari chetlab o’tilmoqda.

Ularning aytishicha, muxolif qarashdagi faollarga ta’qiblar kuchaymoqda, ularni jamoatchilikka haqiqiy jinoyatchi qilib ko’rsatish harakati kuzatilyapti.

Yaqinda O’zbekiston televideniyesi qamoqdagi shoir Yusuf Juma oilasi haqida ko’rsatuv namoyish etdi. Filmda Yusuf Juma va oilasi militsiyaga hujum qilganlikda va boshqa jinoyatlarda ayblangan.

Yusuf Juma, deydi faollar, aslida muxolif qarashlari va bu qarashlarini himoya qilishga jazm etgani uchungina jazoga tortilmoqda.