Sobiq direktor so‘nggi manzilga kuzatildi

NewsUz - "O‘zbekiston" havo yo‘llari milliy aviakompaniyasining sobiq rahbari Arslon Ro‘zmetov Toshkentda dafn etildi. Davlat mulkini talon-taroj qilish aybi bilan sudga tortilgan marhum ichki ishlar vazirligi jazoni ijro etish boshqarmasiga qarashli shifoxonada vafot etdi. Mamlakat hayotida bu kabi holat - yuqori lavozimli rahbarning qamoqxonada vafot etishi kam uchraydi.

Arslon Ro‘zmetov O‘zbekiston havo yo‘llari milliy aviakompaniyasiga o‘n yilga yaqin vaqt rahbarlik qildi. Aynan u boshchilik qilgan paytda aviakompaniya ish tizimi tubdan o‘zgardi, xorijdan zamonaviy samolyotlar sotib olindi. U bir paytlar mamlakatning birinchi raqamli uchuvchisi sifatida faoliyat yuritdi, mamlakat rahbari Islom Karimovning xorijiy safarlariga sarbonlik qildi. Biroq milliy aviakompaniya rahbarining korruptsiya bilan bog‘liq qilmishi unga nisbatan ta'qibning kuchayishiga sabab bo‘ldi.

Ma'lumotlarga qaraganda, Arslon Ro‘zmetov 1990-yillar oxirida xorijiy samolyotlarni sotib olish paytida katta miqdorda mablag‘larni o‘zlashtirgan. Aynan davlat mulkini o‘zlashtirish bilan bog‘liq ayblov uning 2002 yilda aviakompaniya rahbarligidan ketishiga sabab bo‘ldi.

Arslon Ro‘zmetovning jinoiy qilmishlar haqida ovozalar tarqalgan paytda u Moskvaga ketishga muvaffaq bo‘ldi. To‘g‘rirog‘i, unga ana shunday imkoniyat berildi.  O‘zbekistonda jinoyatda ayblangan shaxs Rossiya poytaxtiga bemalol yetib olgani va u yerdagi aeroportlardan biri (Vnukovo)ga rahbarlik qila boshlaganidan keyin ko‘pchilik uni o‘zbek rasmiylari avf etishdi, shekilli deb o‘ylagan edi. Biroq kutilmaganda o‘tgan yili jinoiy ish ochilgani munosabati u Rossiya huquq idoralari tomonidan hibsga olindi va O‘zbekistonga yuborildi.
So‘nggi paytlarda Arslon Ro‘zmetovga ham 2007 yilning dekabrida qabul qilingan amnistiya akti qo‘llanishi va ozodlikka chiqarilishi haqida xabarlar tarqalgandi. Lekin IIVga qarashli UYa 64/18 muassasasida davolanayotgan sobiq rahbarga ozodlikka chiqish nasib etmadi.