Prokurorning inqirozi NewsUz -
O‘zbekiston bosh prokurorining o‘rinbosari Anvar Nabiev unga nisbatan
jinoiy ish qo‘zg‘atilgani munosabati bilan hibsga olindi. Uzoq yillar
mamlakat milliy xavfsizlik xizmatidan ishlab kelgan polkovnik Andijon
voqealari munosabati bilan qamoqqa olinganlarga qarshi davlat
ayblovchisi sifatida nom chiqargandi. Bir paytlar Milliy xavfsizlik xizmati Tergov boshqarmasiga
rahbarlik qilgan Anvar Nabiev yana tergov jarayonida ishtirok etyapti.
Biroq oldingilardan farq qilib, bu gal tergovchi sifatidan emas,
gumonlanuvchi sifatida. Unga nisbatan qo‘zg‘atilgan ishni Toshkent
shahar prokuraturasi olib boryapti. Aslida Anvar Nabievning
ishi tergovga tushgani haqiidagi mish-mishlar bundan avvalroq paydo
bo‘lgandi. Manbalarga ko‘ra, yuqori lavozimli xavfsizlik ofitseri bosh
prokuror o‘rinbosari bo‘lib turgan paytda ham gumondor sifatida
tergovga jalb etilgan. Anvar Nabiev MXX tizimidagi muhim
tarmoqlardan biri - tergov boshqarmasiga rahbarlik qildi. Andijon
voqealaridan keyin u ushbu ish bo‘yicha qamoqqa olingan o‘nlab
kishilarni tergov qilishga boshchilik qildi, Oliy sudda o‘tkazilgan
namunali mahkama jarayonida davlat qoralovchisi sifatida ishtirok etdi.
Bu paytga kelib u mamlakat bosh prokurorining birinchi o‘rinbosari
lavozimiga tayinlangandi. Andijon voqealari bo‘yicha
xizmatlar inobatga olinib, u oz muddat o‘tib O‘zbekiston Prezidenti
davlat maslahatchisi etib tayinlandi. Bu polkovnik uchun katta
ko‘tarilish edi. Chunki aynan davlat maslahatchisi mamlakatdagi barcha
huquq idoralari ustidan nazorat funktsiyasini amalga oshiradi. Lekin
Anvar Nabiev prezident devonida ko‘p ishlamadi. Ko‘p ham o‘tmay u yana
bosh prokuror o‘rinbosariligiga qaytarildi. Anvar Nabievning
nomi bundan oldinroq bir qator kriminal xabarlarda ham bot-bot tilga
olingan. Xususan, jinoyat ishlari bo‘yicha Toshkent щahar sudining
sudyasi Zokirjon Isaevning Oliy sud raisi Bo‘ritosh Mustafoev nomiga
yozgan shikoyatida A. Nabiev korruptsiya, ta'magirlik va poraxo‘rlikda
ayblangandi. Mazkur shikoyatda davlat maslahatchisi o‘z lavozimidan
foydalanib bir qator jinoyatchilarni himoya qilib kelayotgani qayd
etilgandi. Shunga asoslanib, ayrim tahlilchilar polkovnikning hibsga
olinishiga sobiq sudyaning shikoyat xati va unda aytilgan fikrlar ham
ta'sir etgan bo‘lishi mumkin demoqdalar. O‘z nomini oshkor
etishni istamagan mahalliy kuzatuvchilardan biri esa vaziyatni shunday
baholaydi: "O‘zbekiston sharoitida yuqori lavozimli amaldorlarga qarshi
aytilgan so‘zlar odatda qumga singigan suvdek izsiz ketadi. Anvar
Nabievning hibsga olinishiga ham faqat Z. Isaev tomonidan ilgari
surilgan ayblov asos bo‘lgan deyish noto‘g‘ri bo‘lardi. Chunki bosh
prokuror o‘rinbosarining qamoqqa olinishi oradan ancha vaqt o‘tganidan
keyin ro‘y beryapti. Shundan kelib chiqib, Anvar Nabievning ayni paytda
mavjud hukumatga foydasidan zarari ko‘p tegayotgani sababli birdaniga
unga qarshi aytilgan ayblovlar esga olinib, u qamoqqa olindi deyish
mumkin. Ushbu maqsadda esa sudya va unga o‘xshash kishilarning
fikrlaridan foydalanilishi turgan gap". Aytish kerakki, Anvar
Nabiev kabi organ, xususan maxfiy xizmat tizimida katta nufuzga ega
bo‘lgan amaldorning hibsga olinishi bunga bog‘liq holda, zanjir kabi
boshqa o‘rta qatlam mansabdorlarini ham o‘z domiga tortishi mumkin.
Yoki birgina katta qurbonlik evaziga qolgan o‘rtamiyona amaldorlar
jazodan qutulib qolishi ham hech gap emas. Voqealar rivoji baribir ko‘p
jihatdan sanoqli kishilarning kayfiyatiga bog‘liq. Lekin aksariyat
tahlilchilar amaldagi hukumatga uzoq yil xizmat qilgan polkovnikka
qattiy jazo berilmasligi, avf yoki boshqa shakldagi yo‘llar bilan
belgilangan jazodan ozod etilishini taxmin qilmoqdalar. Manbalarga
ko‘ra, Anvar Nabiev davlat maslahatchisi bo‘lib ishlagan paytdagan
paytda unga bosh konsultantlik qilgan To‘lqin Usmonov ham hibsga
olingan. U xavfsizlik xizmati tomonidan tergovga jalb etilgan. |