NewsUz - Prezident
Islom Karimov mamlakat bosh vaziri Shavkat Mirziyoevni lavozimidan
ketkizdi. Uzmetronom internet nashri xabar berishicha, davlat rahbari
bu haqdagi farmonga 21 fevral kuni imzo chekdi. Hukumat rahbarining
bo‘shab qolgan kursini esa shu kungacha bosh vazir o‘rinbosari va
moliya vaziri vazifasi bajarib kelgan Rustam Azimov egalladi.
Islom
Karimovning xos odami sifatida e'tirof etiladigan Shavkat Mirziyoevning
bosh vazirlikdan ketishi to‘g‘risidagi gap-so‘zlar o‘tgan yilgi
prezident saylovidan oldinroq paydo bo‘lgandi. Lekin saylov arafasida
bosh vazirning lavozimdan ketishi mamlakatda umumiy siyosiy holat va
xalq kayfiyatiga ta'sir ko‘rsatishi mumkin edi. Shu bois ham,
Samarqand, Jizzax viloyatlaridagi rahbarlik paytida shafqatsizligi
bilan nom chiqargan arbobning ketishi saylovdan keyin, mamlakat rahbari
go‘yoki yangi siyosiy kursni e'lon qilgan paytda amalga oshirildi. Albatta,
Shavkat Mirziyoev kabi mamlakat rahbariga sadoqat bilan xizmat qilgan
arbobning ko‘chada qolishini tasavvur etish qiyin. Manbalarga ko‘ra, u
Farg‘ona viloyati hokimi etib tayinlanadi. Bu to‘g‘ridagi qaror xalq
deputatlari Farg‘ona viloyat kengashining bugun o‘tadigan yig‘inida
qabul qilinishi kutilyapti. Darvoqe, ushbu yig‘inda davlat rahbari
Islom Karimov ham ishtirok etishi ko‘zda tutilgan. Shavkat
Mirziyoev to‘rt yillik bosh vazirlik paytida jamoatchilik nazaridan
chetda bo‘lishga urindi. Mamlakat katta siyosatida u qadar ta'sirga ega
bo‘lmagan arbob shunchaki ijrochi, texnik bosh vazir vazifasini bajardi. Shavkat
Mirziyoev 1957 yilda tug‘ilgan. Toshkent irrigatsiya institutini
tamomlagan. Uzoq yillar mazkur institutning partiya tashkilotida
ishladi, prorektor vazifasida xizmat qildi. Institut prorektorligidan
Toshkent shahar Mirzo Ulug‘bek tumani hokimligiga ko‘tarildi. Shu
tariqa u mansab pillapoyalaridan yuqorilay boshladi. 1996 yildan 2001
yilgacha Jizzax viloyati hokimi, 2001 yil 11 sentyabrdan 2003 yil 11
dekabrigacha Samarqand viloyati hokimi vazifasi bajardi. 2003 yilning
11 dekabrida esa O‘zbekiston bosh vaziri lavozimiga tayinlandi. -
Shavkat Mirziyoevning lavozimdan ketishi amalda davlat siyosatiga u
qadar katta ta'sir ko‘rsatmaydi, - deydi mahalliy tahlilchi Botir
Azimov. - Nega deganda, O‘zbekiston kabi prezidentlik boshqaruviga
tayangan davlatda bosh vazir ko‘p narsani hal etmaydi. Lekin qishloq
xo‘jaligi sohasi vakili bo‘lgan Mirziyoevning o‘rniga amaldagi moliya
vazirining tayinlanishidan mamlakat iqtisodida bundan buyon sanoat va
ishlab chiqarishning o‘rni oshishini taxmin qilish mumkin |