Rossiya musulmonlarining taniqli peshvolaridan
biri Geydar Jamol yaqinda Ozarbayjon matbuotiga bergan intervyusida,
siyosiy kuchlar ko’ra-bila turib, irqchilikka yo’l qo’ymoqda degan.
Geydar Jamol fikricha, Rossiya arzon ishchi kuchidan manfaatdor,
irqchilik sabablarini mehnat bozoridagi raqobatdan emas, balki siyosiy
doiralardan izlash kerak.
2007 yilda Moskva shahrining o`zida 26 nafar o`zbekistonlik
shovinistlar tomonidan o`ldirilgan. Rossiyada bu raqam qanchaligi
ma`lum emas.
O`zbekistonda xorijdagi mehnat muhojirlari taqdiri va huquqlarini
himoya qiluvchi davlat idorasi ham, nodavlat tashkiloti ham yo`q.
Rossiya-O’zbekiston aloqalari ittifoqchilik ruhida kechmoqda. Biroq
o`zbek muhojirlari taqdiri borasida biror qaror yoki hujjat qabul
qilingani yo’q.
Tahlilchilar nazarida Rossiyada avtoritar tuzum va millatchilik birga ildiz otmoqda.
“Rossiya hukumati ularga qarshi kurashish o`rniga ma`lum ma`noda
befarq qarab turibdi. Tegishli jazo bo`lmagandan keyin muhojirlarga
nisbatan hujumlar ko`paymoqda. Avtoritar tuzum o`zi rus millatini
ulug`lash, Rossiyani oldingi imperiya darajasiga ko`tarish uchun xizmat
qilmoqda. Bunga esa millatchilik orqali erishilmoqchi, Rossiyadagi
avtoritar tuzum va boshqa millatlarga munosabat bir-biri bilan
chambarchas bog`liq”, - deydi sharhlovchi Toshpo`lat Yo`ldoshev.
Rossiyadagi o`zbeklar taxminan 2-3 million kishini tashkil etadi. Aksariyati hujjatsiz.
“Har bir oiladan besh kishigacha chetga ish izlab chiqib ketgan,
asosan Rossiyaga, keyin Qozog`istonga. Bu hali o`rganilmagan mavzu,
lekin yaqin kelajakda muhojirlaning muvaffaqiyatlilari siyosatga
aralasha boshlashi mumkin”, - deydi huquq himoyachisi Suhrob Ismoilov.
O`zbekistonda iqtisodiy ahvol va ishsizlik natijasida xorijga ish
izlab ketish holatlari ko’paygan. Mehnat muhojirlari O`zbekistondagi
oilalarini boquvchi asosiy manbaga aylangan.