15 yoshli Gulchehra noqonuniy trafika qurboni bo‘ldi NewsUz. Qoraqalpog‘iston respublikasining
To‘rtko‘l shahrida yashaydigan 15 yoshli Gulchehra noqonuniy trafika
qurboni bo‘ldi. Yaqinlaridan yashirincha, aldov yo‘li bilan
Qozog‘istonga olib ketilgan qizaloq odam qiyofasidagi maxluqlar
tomonidan zo‘rlangan. O‘zbekiston fuqarolarining tahqirlanishi bilan
bog‘liq bu kabi holat birinchi marta uchrayotgan yo‘q.
"Istiqbolli
avlod" nodavlat tashkilotidan ma'lum qilishlariga qaraganda, 2007
yilning mayida Gulchehra To‘rtko‘lga bozoriga kundalik buyumlar xarid
qilish uchun keladi. Bozordagi qimmatbaho buyumlar va taqinchoqlar
onasi va o‘gay otasi bilan istiqomat qiladigan qizni o‘ziga rom etadi.
Shu payt uning oldiga o‘rta yoshlardagi Muhabbat ismli ayol
yaqinlashadi. Suhbat asnosida u hali aqlini tanimagan qizga
Qozog‘istonda yashayotgan singlisining kafesi borligi, u yerga
ofitsiantka kerakligini aytadi. Gap orasida oylik maosh 300 dollar
ekanini ham qistirib o‘tadi. Onasiga tirikchilik tashvishlarida yordam
berishni orzu qilib yurgan Gulchehraga taklif ma'qul keladi. Onasidan
ruxsat so‘rashi, agar rozi bo‘lsa, borishi mumkinligini aytadi. Asli
qo‘shmachi ayol bo‘lgan Muhabbat uni avrashga tushadi. Shu tariqa
Gulchehra onasidan ruxsat so‘raydigan va ikki kundan keyin shu bozor
hududida u bilan uchrashishga rozilik beradi. Ikki kundan
keyin bozorda qo‘shmachi bilan uchrashgan qiz Qozog‘istonga bormasligi,
onasidan ruxsat olishga ham yuragi dov bermaganini aytadi. Lekin pixini
yorgan ayyor qo‘shmachi ayol uni aldab, qo‘rqitib, avtobusga chiqaradi
va Qozog‘istonga olib ketadi. U bilan birga 18-20 yoshdagi uch nafar
qiz ham qo‘shni davlatga boradi. Qozog‘istonning Ostona
shahrida Gulchehrani kafedagi ish emas, dahshatli xorlik va zo‘ravonlik
kutayotgan edi. Uni turli erkaklar bilan jinsiy aloqa qilishga
majburlashadi. Bir oylik qiynoqlardan keyin qiz kvartiradan qochib
ketdi. Shaharning turli joylarida adashib-uloqib yurgan Gulchehra
yaxshi insonlarning ko‘magi bilan 2007 yilning noyabrida Nukusga
kelishga muvaffaq bo‘ldi. O‘zbekistondan xorijga borib, o‘z
ixtiyori bilan tanasi sotib pul topayotganlar ham uchrab turadi. Shu
bilan birga Gulchehra kabi hali aqlini tanimagan, himoyasiz va ijtimoiy
himoyaga muhtoj ko‘plab yoshlar ham zo‘ravonlik va qiynoqlar qurboni
bo‘lmoqdalar
|