Rossiya
Federatsiyasida 240 ming O‘zbekiston fuqarosi ma'muriy javobgarlikka tortildi
NewsUz. O‘tgan yilning o‘zida Rossiya
Federatsiyasida 240 ming nafar O‘zbekiston fuqarosini viza-pasport
qoidasini buzgani uchun ma'muriy javobgarlikka tortildi. Bu raqamni
O‘zbekiston ichki ishlar vazirligi Xorijga chiqish-kelish va fuqarolik
boshqarmasi rahbari o‘rinbosari, polkovnik Mirjalol Karimov keltirdi.
U o‘zbek muhojirlari o‘ta og‘ir sharoitlarga tushib qolayotganlarini
ham e'tirof etdi.
Ichki ishlar vazirligi amaldorining
Press-uz.info agentligiga ma'lum qilishicha, O‘zbekistonda migratsiya
munosabatlari tartib soluvchi qonun loyihasi tayyorlandi. Qonunchilik
faoliyatida o‘ziga xos yangilik bo‘lgan qonun loyihasi davlatlararo
muhokamada. Hozirga qadar muhojirlarga doir maxsus qonun zarurat
xususida ko‘p gapirilishiga qaramay, qonunchilik idorasi mazkur
talablarni e'tiborsiz qoldirib kelayotgan edi. Vazirlikning
yuqori lavozimdagi vakiliga ko‘ra, ayni paytda ichki ishlar idoralari
noqonuniy migratsiyani kamaytirish uchun kurash olib boryapti. Buning
uchun esa noqonuniy migrantlarga ma'muriy va jinoiy javobgarlikni
oshirish ham rejalashtirilmoqda. M. Karimovning ma'lum
qilishicha, Ichki ishlar vazirligi xorijga chiquvchilarni ogohlantirish
uchun turli adabiyot va risolalar tayyorlayapti. Migratsiya
jarayonlari, milliy xavfsizlik xizmati, mahalliy hokimiyat idoralari,
Mehnat va aholini ijtimoiy himoya qilish vazirligi bilan birga olib
borilyapti. IIVning vakili olib borilayotgan ishlar ijobiy
samara berayotgani ta'kidlagan. Uning aytishicha, 2007 yilda Rossiyada
yurgan o‘zbek muhojirlarining ko‘pchilik qismi legalizatsiya qilindi. Kuzatuvchilarga
ko‘ra, Rossiyada mehnat qilayotgan o‘zbek muhojirlarining ahvoli
og‘irligicha qolmoqda. Fuqarolarnig davlat tomonidan muhofaza
etilmayotgani tufayli muhojirlar orasida o‘lim holatlari ham ko‘p
uchramoqda. Norasmiy ma'lumotlarga ko‘ra, Rossiya
Federatsiyasida O‘zbekistondan borgan muhojirlar soni 5-6 millionni
tashkil etadi. Rasmiy idoralar esa rus tuprog‘idagi o‘zbek muhojirlari
sonini ikki million deb ko‘rsatishadi. Rossiyadagi muhojirlar
orasida miqdor bo‘yicha o‘zbeklar birinchi o‘rinda turadi (17,5 foiz),
ikkinchi o‘rinda esa xitoyliklar (15,5 foiz). Bu haqja Rossiya Federal
muhojirlik xizmati direktori Konstantin Romadanovskiy xabar bergan
|