Jahon bankidan 300 million dollarlik saxova NewsUz. Jahon
banki O'zbekistonda amalga oshirayotgan loyihalarini kengaytirishni
ko‘zlamoqda. Vesti.uz saytining xabar berishicha, 2008-2010 yillarda
xalqaro tashkilot O'zbekistonga 300 million dollar kredit berishi
mumkin. Tahlilchilar bu holatni bankning O'zbekistonga munosabati
ijobiy tomonga o‘zgarayotgani bilan izohlamoqdalar. Jahon bankining Toshkentdagi vakolatxonasi xodimi ma'lum
qilishicha, ayni paytda O'zbekistonga moliyaviy ko‘mak strategiyasini
ishlab chiqarish nihoyasiga yetib qoldi. Bunga ko‘ra, uch yillik muddat
davomida mamlakatga melioratsiya, atrof muhit muhofazasi, kommunal
xizmat ko‘rsatish sohasini yaxshilash, ijtimoiy himoya sohalariga uchun
yiliga 90-100 million dollar kredit ajratilishi rejalashtirilgan. Kredit
imtiyozli tartib qirq yil muddatga beriladi. Mazkkur muddatning
dastlabki o‘n yilida 0,75 foiz yillik ustama to‘lovlari berilishi
kerak. Bu boradagi so‘nggi qaror Jahon banki direktorlar kengashi
tomonidan may oyining oxirida, iyun boshlarida chiqariladi. Bundan
ikki yil oldin O'zbekiston hukumati tomonidan qashshoqlikka qarshi
kurash va aholi farovonligini oshirish bo‘yicha davlat dasturi ishlab
chiqilgan edi. Jahon bankining uch yillik strategiya loyihasi ham ana
shu dasturdan kelib chiqib tayyorlanmoqda. Andijon
voqealaridan keyin Jahon banki ham O'zbekiston rasmiylari bilan
aloqalarni to‘xtatgan edi. Keyinroq 2006 yilning martida bank
O'zbekistonga 2006-2009 yillarga mo‘ljallangan strategik hamkorlik
rejasi bo‘yicha yangi kreditlar berishni ma'lum qildi. Jahon banki O‘zbekistondagi o‘n besh yillik faoliyati davomida 650 mln. dollarlik sarmoya kiritdi. Bankning
mamlakatdagi dasturlari ijtimoiy infratuzilmani yaxshilashga ham
yo‘naltirilgan. Ya'ni xalqaro moliya tashkiloti mablag‘lari asosida
uy-joy qurilishi, kommunal tizim ham rivojlantiriladi. Bundan tashqari,
Jahon banki loyihalari ta'lim tizimiga ko‘mak berish, sog‘liqni saqlash
sohasini taraqqiy ettirish kabi maqsadlarga ham qaratilgan. O‘zbekiston
uchun qashshoqlik og‘riqli muammo sanaladi. Biroq uni hal etish
borasida xalqaro tashkilotlar yordamisiz ijobiy natijalarga erishish
anchayin og‘ir kechadi. Bu borada Jahon banki bir qator uzoq muddatli
loyihalarga ega.
|