NewsUz.
29 fevral kuni Andijon shahrining yuzga yaqin aholisi viloyat
hokimiyati binosi oldida norozilik chiqishi uyushtirishga urindi.
Viloyat ma'muriyati oldiga kelishga harakat qilgan aholi elektr
ta'minoti uzluksiz bo‘lishini talab qildi. Biroq mavjud ijtimoiy
vaziyatdan norozi aholi viloyat hokimiyatiga qadar yetib bormadi. Ozodlik ovozi saytining xabar berishicha, voqea joyiga yetib
kelgan viloyat militsiyasi namoyishchi aholiga to‘xtatgan. Hodisa
shohidlarining ma'lum qilishicha, militsiya aholining talabiga quloq va
osib o‘tirmagan va birdaniga ularga qarshi kuch ishlatishga o‘tgan. Andijon
aholisining noroziligi bejiz emas. Bu yilgi qish mamlakatning barcha
hududlari qatori Andijon ahli uchun ham og‘ir keldi. Har yilgi gaz
yetishmasligi muammosi ustiga bu yil elektr taqchilligi ham qo‘shildi.
Odamlar odatda qishning qahratonida jon saqlash uchun elektrdan
foydalanishar edi. Bu yil elektr ta'minotining qisqargani vaziyatni
battar murakkablashtirdi. Amaldorlar-ku, bir amallab qishni
o‘tkazishdi. Lekin tayoq baribir oddiy xalq boshida sindi. Avom boshini
qay devorga urishni bilmay qoldi. Mahalliy aholining so‘zlariga
ko‘ra, bundan o‘n kuncha oldin ham Andijon shahridagi elektr
stantsiyalardan birida portlash bo‘lgan, buning natijasida shaharning
deyarli yarim aholisi ikki kun davomida elektrsiz qolgan edi. Andijon
aholisi elektr ta'minotidagi uzilishlardan norozi bo‘lib turgan bir
paytda viloyat hokimiyati tashabbusi bilan 100 ga yaqin maxsus guruh
tuzildi. Mahalliy hokimiyat va huquq idoralari vakillaridan iborat
guruh uyma-uy yurib energiyadan noqonuniy foydalanayotganlarni qidirish
bilan shug‘ullanmoqda. Guruhning dastlabki natijalari yomon emas.
Hozirga qadar viloyat bo‘yicha tabiiy gazdan noqonuniy foydalanish
bo‘yicha 607, elektr tarmog‘iga noqonuniy ulanish bo‘yicha 376 holat
aniqlandi. Mahalliy aholi esa ahvol o‘zi shundoq ham og‘ir bo‘lib
turgan, gaz va elektr yetishmayotgan bir paytda maxsus guruhlarning
tashkil etilganini haqorat o‘rnida qabul qilmoqda. Andijon
2005 yil maydagi voqealardan keyin butun dunyoga nom taratdi. 4,2 ming
kv. km. hududli viloyatda O‘zbekiston aholisining ikki milliondan
ortiqrog`i istiqomat qiladi. Aholining zichligi bo‘yicha eng yuqori
ko‘rsakich qayd etilgan hududda ijtimoiy-iqtisodiy muammolar ham
nisbatan kuchli.
|