|
Rossiya hukumati migrant ishchilar tazyiqqa uchrayotganini biladi |
Moskvada
mehnat muhojirlarini ro`yxatga olishni erkinlashtirish haqida qabul
qilingan qaror noqonuniy ishlayotgan minglab o`zbeklarda ham umid
uyg`otgan. Biroq qaror amaliyoti murakkabligicha qolmoqda.
O’zbekistonda ham mehnat muhojirlari bilan bo`gliq masala muhokama
ostida. Sharhlovchilar fikricha minglab o`zbekistonliklarning chetda
haq-huquqsiz qolayotgani tashvishga molik va Islom Karimov rahbariyati
bu borada o’ylanishi zarur.
Bahor kelishi bilan Rossiyaga ishga jo’nayotganlar soni oshgani kuzatilmoqda.
“Yaqinda bir tanishim, yigirma kun oldingi poyezd chiptalari sotib
bo`lingani haqida aytdi. Un ketolmaysan deyishgan. 1916-yillarda
Turkistondan yuz minglab kishilar Rossiyaga majburan mardikorchilikka
olib ketilgan edi. Oradan yuz yil o`tib bu ajdodlarning avlodlari o`z
ixtiyori bilan mardikorchilikka ketayapti”, - deydi fuqarolardan biri.
|
Rossiyada millatchilik kayfiyati avj olmoqda |
Yaqinda
Moskva shahar hokimyati mehnat muhojirlari ikki ming rubl to`lab hech
qanday qarshiliksiz ro`yxatdan o`tishlari mumkin deya e’lon qilgan edi.
Huquq himoyachilarining aytishicha bu qaror ishga tushmasdanoq to`xtagan.
“Qaror chiqqach, muhojirlar oqib kela boshlagan. Keyin Rossiya
federal migratsiya xizmati rahbari bu narsani inkor qildi. Oxir oqibat
bu qaror mehnat muhojirlari uchun qo`yilgan tuzoq bo`lib chiqdi ”, -
deydi “Ezgulik” inson huququlari jamiyati vakili Abdurahmon Tashanov.
So`nggi paytda rus millatchilari tomonidan markaziy osiyoliklarga
bo`layotgan hujumlar va qotilliklar mintaqa davlatlari rasmiy
doiralarda ham muhokama qilingan.
Xususan, Qirg`iziston parlamenti rus millatchiligi qurbonlari
haqidagi masalani ko`rib chiqqan va bu borada Rossiya rasmiylariga o`z
noroziligini bildirgan.
Prezident Vladimir Putin Mustaqil Davlatlar Hamdo’stligi
yig’ilishida Rossiyada millatchilik kayfiyati avj olayotganini tan
olgan.
Sharhlovchilar shovinizm ruhi alanga olishida Rossiya siyosiy doiralarining hissasi katta deydi.
Tahlilchi Akbar Aliyev fikricha esa mehnat muhojirlarining bugungi ahvoli uchun avvalo O`zbekiston hukumati aybdor.
“Muhojirlar Rossiyadagi eng o`gir ishlarni qilishga rozi. Ruslar
oladigan maoshning 40 yoki 30 foizini oladi. Bu degani Rossiya
iqtisodiyotini ma’lum ma`noda muhojirlar ko`tarmoqda. Bu Rossiya uchun
katta foyda, biroq biz uchun yo`qotish. Iqtisodiy tomonigina emas,
ma’naviy tomondan-chi! Ular xor-zor bo`lib yurishibdi. Shaxsan
o`zimning opamni o`g`li Rossiyada yo`qolib ketdi. O`ldirib
yuborishdimi, boshqa qilishdimi… Vatandoshlarimizni himoya qilishning
asosiy yo`li shu yerda ishchi o`rinlarini yaratish. Buni esa hozirgi
hukumat uddalay olmayapti”, - deydi Aliyev.
Yaqinda O`zbekiston hukumati aholi migratsiyasi haqida qonun loyihasi tayyorlagan.
Huquq himoyachilari nazarida bu ijobiy qadam.
“Yo`qdan ko`ra bori yaxshi albatta. Biror kor-hol bo`lganda yoki
shovinistlardan ziyon ko`rilganda bir yordami tegishi mumkin. Lekin
muammoni bu narsa hal qilmaydi. Muammoga O`zbekistondagi ishsizlik,
qashshoqlik va ijtimoiy [nochorlik] sabab bo’lmoqda”, - deydi
Abdurahmon Tashanov