Qamoqxonadan uyiga qo‘yib yuborilganiga ishonmayapti NewsUz. O‘zbekistonda yana bir inson huquqlari
faoliga amnistiya akti qo‘llandi. «Ezgulik» inson huquqlari
jamiyatining Jizzax viloyati Zomin tumani bo‘limi rahbari Ulug‘bek
Kattabekov senat tomonidan qabul qilingan avfi umumiy ko‘ra ozodlikka
chiqarildi. Voice of Freedomning xabar berishicha, sobiq mahkum hali
ham qamoqxonadan uyiga qo‘yib yuborilganiga ishonmayapti.
43
yoshli Ulug‘bek Kattabekov ham aksariyat inson huquqlari faollari va
jurnalistlar kabi 2005 yili Andijon voqealaridan keyin hibsga
olingandi. Boshqa to‘qima ayblovlar kabi unga ham firibgarlik jinoyati
bo‘yicha ish ochildi. Jinoyat ishlari bo‘yicha Yangiobod tumani sudi
uni uch yarim yil muddatga ozodlikdan mahrum etish jazosiga hukm qildi.
Ikki yilu olti oy umri panjara ortida o‘tgan Ulug‘bek
Kattabekov ozodlikdan mahrum etish muassasasida unga yaxshi munosabatda
bo‘lishgani ma'lum qilgan. Bundan buyon inson huquqlarini himoya qilish
bo‘yicha faoliyatini davom ettirishi borasida esa hali yakuniy
to‘xtamga kelmaganini aytgan. 2007 yilning dekabrida
O‘zbekiston Konstitutsiyasi qabul qilingani kunning 15 yilligi
munosabati bilan mamlakat Senati tomonidan e'lon qilingan amnistiya
akti bu yil ilk marta inson huquqlari himoyachilari va jurnalistlarga
ham qo‘llandi. Shu asosda Andijon voqealaridan keyin qamalgan bir
qancha huquq himoyachisi ozodlikka chiqarildi. Tahlilchilar mazkur
siyosiy o‘zgarishni AQSh va Yevropa Ittifoqi tomonidan rasmiy Toshkent
bilan olib borilgan muzokaralar natijasi deb baholamoqdalar. U.Kattabekov joriy yilning yanvar-fevral oyi davomida amnistiyadan foydalangan oltinchi inson huquqlari faoli bo‘ldi
|