Militsiyaning o`zi hujjat soxtalashtirdi NewsUz. Sirdaryo
viloyati sud idoralarida militsiyaning mansabdor shaxslaridan iborat
jinoiy guruh ishi ko‘rib chiqildi. Poraxo‘rlik, bojxona qonunchiligini
buzish va xizmat vazifasini suiiste'mol qilishda ayblangan organ
xodimlari uzoq muddatga ozodlikdan mahrum etildi. Mahkumlar viloyat
yo‘l harakat xavfsizligi boshqarmasida ishlagan.
Press-uz.info
saytining Sirdaryo viloyati sud idoralariga tayanib xabar berishicha,
viloyati ichki ishlar boshqarmasi yo‘l harakat xavfsizligi boshqarmasi
registratsiya-imtihon bo‘limi rahbari Abdusaid Azimov faoliyati
davomida pora evaziga soxta hujjatlar to‘g‘rilab bergan. U asosan
xorijdan bojxona to‘lovisiz keltirilgan mashinalarni qonuniylashtish
bilan shug‘ullangan. Masalan, 2006 yili A.Abduazimov chetdan olib
kirilgan «Tiko» mashinasini G.Xudaybekova nomiga qalbaki hujjat bilan
rasmiylashtirib berdi. Buning evaziga esa 500 dollar oldi. Undan
keyin mazkur vazifada ishlagan G‘ayrat O‘ralov ham ustozining ishini
davom ettirdi. Sud tergoviga ko‘ra, 2006 sentyabrida 1200 dollar
evaziga «Neksiya» avtomobiliga soxta guvohnoma yasab berdi. Sud idorasi
zikr etilgan va yana bir nechta militsiya xodimi hamda oddiy
fuqarolardan tashkil topgan jinoiy guruhni uzoq muddatli ozodlikdan
mahrum etigsh bilan jazoladi. Militsiya xodimlari mamlakat Jinoyat
kodeksining 210- (poraxo‘rlik), 182- (bojxona qonunlarini buzish), 209-
(xizmat vazifasini suiiste'mol qilish) moddalari bilan ayblandi. Oxirgi
paytlarda mamlakatda ichki ishlar xodimlari bilan bog‘liq ko‘plab
jinoiy ishlar ko‘rib chiqilmoqda va militsiya idorasi vakillariga
keskin jazolar tayinlanyapti. Ayrim mutaxassislar buni organ tizimida
tozalash o‘tkazilayotgani bilan izohlamoqda. Boshqa guruh tahlilchilar
esa onda-sonda yuz berayotgan hibslar organ tizimida tozalashdan darak
bermasligi, bu shunchaki omma nigohi uchun, odamlarni ozroq osoyishta
qilish uchun o‘tkazilayotgan tomosha degan fikrdalar. Ma'lumotlarga qaraganda, mamlakat miqyosida ichki ishlar tizimida 110 mingdan oshiqroq xodim mehnat qiladi.
|