Moskva ostonasida fojia NewsUz -
14 martga o‘tar kechasi Moskva viloyatida yuz bergan avtomobil falokati
oqibatida o‘zbekistonlik olti nafar fuqaro va rossiyalik haydovchi
qurbon bo‘ldi. Jarohatlangan yana besh nafar o‘zbekistonlik shifoxonaga
keltirildi. Halokat qurbonlarining barchasi tirikchilik tashvishida
Moskvaga borgan mehnat muhojirlari edi.
Xabarlarga
ko‘ra, avtomobil falokati tunda Moskva viloyatining Galitsino
qishlog‘i yaqinida ikki yuk tashuvchi mashina va bir mikroavtobusning
to‘qnashib ketishi oqibatida yuz bergan. Ford Transit
mikroavtobusidagi 11 nafar o‘zbekistonlik shu kuni vatanidan qaytgan va
Smolenskdagi qurilish uchastkasida ishlash uchun ketayotgan edilar. Rossiya
matbuotida to‘qnashuv paytida halok bo‘lgan muhojir nomlari e'lon
qilindi. Bunga ko‘ra, jabrlanuvchilar 22-36 yoshdagi fuqarolar edi. Moskva fojiasida halok bo‘lgan o‘zbekistonliklar quyidagilar: Davlatyorov Rinat Kenisbaevich, 1985 yilda tug‘ilgan, Zaripov Xolmirza Navbatboevich, 1982 yilda tug‘ilgan, Kubanov Jenisbay Ongarboevich, 1986 yilda tug‘ilgan, Kiyasov Valixan Jubatovich, 1972 yilda tug‘ilgan, Rajapov Jestkergen Taxtaboevich, 1972 yilda tug‘ilgan, G'oipov Jasur Solatboevich, 1986 yilda tug‘ilgan. Avtofojiada
Rossiya fuqarosi Molodenkov Denis Vasilevich ham halok bo‘ldi.
Shuningdek, halokat paytida Ahmedov Yusuf (1978 yilda tug‘ilgan),
Mashirinov Farhod (1977), Poltanov Muhamaddin (1984), Sultonmurotov
Hakimboy (1982) va Bobojonov Yusuf (1964) jarohatlandi. Tahlilchilar
Rossiyada o‘zbekistonlik muhojirlarning avtomobil halokatiga uchrashi
bot-bot uchrayotganini aytmoqdalar. Ana shunday fojialardan biri o‘tgan
yilning 1 mayida Voronej viloyatida ro‘y bergan va unda 13 nafar
O'zbekiston fuqarosi hayotdan ko‘z yumgandi.
|