Namoyishchilarga hujum

NewsUz. 13 mart kuni O‘zbekiston bosh prokuraturasi binosi oldida uyushtirilgan norozilik namoyishi ishtirokchilariga metall buyumlar bilan qurollangan ayollar tomonidan hujum qilindi. O‘zbekiston inson huquqlari alyansi tomonidan tashkil etilgan namoyishga o‘ttiz chog‘li odam yig‘ilgan va siyosiy talablarni ilgari surayotgan edi.

Voice of Freedom ning alyans rahbari Yelena Urlaevaga tayanib ma'lum qilishicha, hujumlardan keyin piketchilarning ikki nafari jarohatlangan holda shifoxonaga yotqizildi. Mamlakatda namoyishlar o‘tkazishi bilan tanilgan huquq himoyachisining taxminiga ko‘ra, hujum organ xodimlari tomonidan uyushtirilgan.

O‘zbekiston inson huquqlari alyansi ko‘pdan beri piketlar tashkil etib keladi. Bu gal ham ittifoq faollari mamlakatdagi siyosiy mahbuslarni ozod qilish, so‘z erkinligi, e'tiqod erkinligini ta'minlashni talab qilishdi.

Voqea shohidlarining so‘zlariga ko‘ra, namoyishlarda Jizzax va Farg‘ona viloyatlaridan kelgan fermerlar ham hozir bo‘lishdi. Ular ishbilarmonlik va fermerlik uchun qonuniy erkinlik berilishi, ular faoliyatiga noqonuniy aralashuv cheklanishi, korruptsiyani batamom tugatish talabi bilan chiqishdi.

Tashkilotchilar namoyishda ko‘zda tutilgandan kamroq odam qatnashganini ma'lum qilishdi. Ularning ta'kidlashicha, Farg‘ona va Jizzax viloyatlarida 12 mart kuni kechqurun, ya'ni piketdan bir kun oldin bosh prokuratura oldida namoyish qilishi mumkin bo‘lgan kishilarning uyida maxsus reyd o‘tkazganlar. Ularning ayrimlari kaltaklandi, ayrimlari uyida esa tintuv uyushtirildi. Bu esa Toshkentdagi namoyishda qatnashishi kutilgan ishtirokchilar soni kamroq bo‘lishiga olib keldi.