Yusuf Juma kutilmaganda advokati himoyasidan voz
ketdi 19.03.2008 y.
NewsUz -
Buxoro viloyati ichki ishlar boshqarmasi uchinchi tergov izolyatorida
saqlanayotgan shoir Yusuf Juma kutilmaganda advokati himoyasidan voz
ketdi. Bu hodisa unga qarshi ochilgan tergov ishi yakunlanib, ayblov
e'lon qilinganda ro‘y berdi. Cobiq advokat Ruhiddin Komilov bu holatni
shunday izohlaydi...
- Himoyamdagi insonning rad
etgani nima bilan bog‘liqligini yaxshi bilaman: shubhasiz, bunga uni
majbur qilishdi, holbuki vaziyat biz tomonga ijobiy o‘zgarishi ehtimoli
bor edi. Lekin ayrim vajlarga ko‘ra ushbu sabablarni ko‘rsata olmayman,
- degan u Voice of Freedomga. Advokat avvalroq Yusuf Jumaning
jamoatchilikka yozgan ochiq xatini olib chiqishga uringan, maktub
tekshiruv chog‘ida olib qo‘yilgan edi. Shoir tomonidan
Prezident saylovi arafasida O'zbekiston rahbari Islom Karimov
siyosatiga qarshi o‘tkazilgan norozilik chiqishlari mahalliy huquq
idoralari tomonidan keskin kutib olindi. 2007 yil 10 dekabrida maxsus
kuch guruh Yusuf Jumaning uyiga bosqin uyushtirdi. O'sha kuni shoir va
uning oilasi hujum joyidan qochib qutuldi. Biroq ko‘p o‘tmay, 2007 yil
17 dekabrida shoir va uning o‘g‘li Bobur Jumaev Toshkent viloyati
hududida hibsga olindi. Unga Jinoyat kodeksinig 219-moddasi (hokimiyat
vakiliga qarshilik qilish) hamda 104-moddasi (og‘ir tan jarohati
yetkazish) aybi bilan jinoiy ish ochildi. Yusuf Jumaev
oilasiga bunga qadar bir necha marta ta'qib amalga oshirilgan. U 2001
yili O‘zbekiston Jinoyat kodeksining 158-modda (prezidentning sha'ni va
qadr-qimmatini haqoratlash) aybi bilan dastlab ozodlikdan mahrum etish
bilan bog‘liq jazoga tortilgan, jazo keyinroq shartli rejimga
alishtirilgan. Ayni paytda shoirning oilasi (rafiqasi Gulnora
Oltieva, o‘g‘illari - 26 yoshli Alisher, 18 yoshli Qodiriy va 9 yoshli
Javhar Jumaev) O'zbekistondan Qozog‘istonga chiqib ketdi. Yusuf Juma va ikki nafar farzandi (Mashrab va Bobur) esa qamoqda.
|