Militsiya... narkotika homiysi 29.03.2008 y.
NewsUz Jinoyat
ishlari bo‘yicha Xorazm viloyat sudida besh nafar sobiq militsiya
ofitseri ustidan ish ko‘rib chiqildi. Narkotrafika va poraxo‘rlikda
ayblangan sudlanuvchilarga uzoq muddatga ozodlikdan mahrum etish jazosi
tayinlandi. Ofitserlar dastlab narkobiznesga homiylik qilishgan,
keyinroq esa o‘zlari ham loyqa biznes ishtirokchisiga aylanganlar.
Sudlanuvchilar
orasida Xorazm viloyati jinoyat qidiruv va uyushgan jinoyatchilikka
qarshi kurash boshqarmasi boshlig‘i o‘rinbosari T. Otaniyozov hamda
uning qo‘l ostida ishlagan tezkor xodimlar D. Kazakov, A.Abdullaev,
X.Polvonov, X.Qurbonovlar bor. Ofitserlarga 11 yildan 13 yilgacha
ozodlikdan mahrum etish jazosi tayinlandi. Ma'lum bo‘lishicha,
jinoyat qidiruv boshqarmasining mas'ul xodimlari viloyatdagi narkotik
moddalar sotuvchi jinoyatchilarning ayblarini yashirib kelganlar.
Buning evaziga esa ulardan katta miqdorda pora olib turganlar. Masalan,
boshqarma boshlig‘i o‘rinbosari T.Otaniyozov jinoyat sodir etgan
shaxsdan uni saqlash qolish evaziga 15 000 dollar talab qilgan. Press-uz.info
nashriga ko‘ra, militsiya ofitserlari jinoyatchilardan tortib oligan
giyohvandlik moddalarini sotish bilan ham shug‘ullanganlar. Masalan,
D.Kazakov 300 gramm narkotik moddani qora og‘u sotuvchi kimsaga
sottirgan va buning evaziga 7 million 500.000 so‘m pul olgan.
Qonun himoyachisi va kurashchisi bo‘lishi kerak bo‘lgan kimsalar og‘ir
jinoyatlarni yashirib kelganlar. Buning ustiga ana shu qilmishlarni
o‘zlari sodir etganlar. Tahlilchilarga ko‘ra, O‘zbekistonda
narkotik moddalar savdosi huquq tartibot idoralari, xususan, militsiya
tomonidan nazorat qilinadi. Ko‘p hollarda giyohvand moddalar sotuvchi
kimsalar yuqori lavozimdagi ofitserlarning homiyligi ostida ish olib
boradi. Buning evaziga esa katta miqdorda ulush beriladi. Xorazmdagi
jinoiy ish mamlakatda keng tarqalgan ana shunday holatlardan biri.
|