NATO O‘zbekistondan nima istaydi, O‘zbekiston NATOdan-chi? 04.04.2008 y.
NewsUz - NATOning
Buxarestda o‘tayotgan sammitida bir necha yillik tanaffusdan keyin
O‘zbekiston rahbari Islom Karimov ham ishtirok etdi. O‘zbek prezidenti
kecha NATOning yopiq majlisda ma'ruza qildi. Yaqingacha rasmiy
Toshkentni tanqid qilib kelgan G‘arb yetakchilari Andijon voqealaridan
keyin ilk marta u bilan yuzma-yuz bo‘lishdi.
Shimoliy alyansning yirik yig‘inida 60 ta davlat boshlig‘i, bir
qator hukumat rahbarlari ishtirok etyapti. Shu bilan birga harbiy
ittifoq mashvarati qatnashchilari orasida Mustaqil Davlatlar
Hamdo‘stligining yetti prezidenti, jumladan, Rossiya rahbari Vladimir
Putin ham bor. "Chaqirilmagan qo‘noq" qabilida baholanayotgan rahbarlar
orasida Turkmaniston prezidenti Gurbanguli Berdimuhamedovni ham ko‘rish
mumkin. Kutilgandek Islom Karimov o‘z ma'ruzasida
Afg‘onistondagi beqaror vaziyat xususida to‘xtaldi. Shu bilan birga
O‘zbekiston uchun NATO bilan munosabatlar muhim ahamiyatga ega ekani,
Toshkent Bryussel bilan aloqalarni rivojlantirish tarafdori ekanini
aytdi. O`zbekiston rahbari NATOning tobora siyosiy tuzilma shaklini olayotganiga e'tibor qaratdi. O`z chiqishida u O‘zbekiston NATO
bilan Noharbiy yuklarni Termiz-Hayraton chegara uzeli orqali yetkazib
berish koridori va tranzitini ta’minlash to‘g‘risidagi bitimni muhokama
qilish va imzolashga tayyor ekanini ma'lum qildi. Shu tariqa rasmiy
Toshkent NATOning Janubiy Kavkaz va Markaziy Osiyo bo`yicha vakili Robert Simmons tomonidan berilgan shov-shuvli bayonot ni qisman tasdiqladi. Mazkur
bitimni qabul qilishda esa joriy yilning 4 martida O‘zbekiston bilan
Germaniya o‘rtasida imzolangan Bundesver yuklarini mamlakat hududidan
temir yo‘l orqali tashish bo‘yicha kelishuvni asos qilib olish mumkin. Islom
Karimov o`z chiqishida Afg`onistondagi vaziyatni yaxshilash uchun bir
qancha takliflar aytdi. Jumladan, "1997-2001 yillarda BMT
ko‘magida samarali faoliyat ko‘rsatgan, Afg‘oniston bilan qo‘shni
davlatlar, Amerika Qo‘shma Shtatlari va Rossiyaning vakolatli
vakillaridan tashkil topgan «6+2» muloqot guruhi doirasida
Afg‘onistonda tinchlik va barqarorlikka erishish bo‘yicha muzokaralar
jarayonini qayta tiklash maqsadga muvofiq, deb hisoblayman" dedi u. Shuningdek, ma`ruzada ilk marta NATO
bilan hamkorlikda xavfsizlikni ta’minlash va mudofaa qurilishi,
ekologiya va gumanitar sohadagi tadbirlar bilan bir qatorda demokratik
yangilash va modernizatsiya qilish, demokratik va fuqarolik
institutlarini mustahkamlash asosiy yo`nalish bo`lishi mumkinligi
aytildi. 2005 yilda ro‘y bergan Andijon voqealaridan keyin
NATO va O‘zbekiston o‘rtasidagi munosabatlar yomonlashdi. G‘arb
mamlakatlarining tanqidiga javoban O‘zbekiston tomoni 2001 yil
oktyabrdan buyon Xonoboddagi harbiy bazadan foydalanayotgan AQShga u
yerdan olti oy muddatda chiqib ketish talabini qo‘ydi. Shu tariqa 2005
yilning 21 noyabrida Qarshi bazasini eng so‘nggi amerikalik askar ham
tark etdi. G‘arb bilan munosabatlar yomonlashuvida
manzarasida O‘zbekiston-NATO aloqalari ham taranglashdi. O‘zbekiston
rahbari Bryusselning qarshi pozitsiyasiga javoban Shimoliy alyans bilan
dasturlarni to‘xtatib qo‘ydi. Buning o‘rniga u barcha sohalar kabi
harbiy jabhada ham Moskvaga tomon yuz burdi. Aslida
O‘zbekistonning NATO bilan hamkorligi 1991 yilning dekabridan
boshlangan. O‘shanda endigina mustaqillik e'lon qilgan davlat NATOning
Shimoliy atlantika hamkorlik kengashiga qo‘shilgandi. U paytlarda yosh
davlat uchun Kremlning hali susaymagan ta'qibidan ihotalanish uchun
qudratliroq tayanch kerak edi. Bu borada esa NATO yaxshi variant
bo‘lishi mumkin edi. Ana shu hayotiy zarurat Toshkentni NATOning
hamkorlik taklifini quchoq ochib kutib olishga undadi. 1994
yilning 13 iyulida O‘zbekiston Shimoliy alyansning yirik loyihalaridan
biri «Tinchlik yo‘lidagi hamkorlik» bitimini imzoladi. Toshkentning
G‘arb bilan munosabatlari iliq bo‘lgan o‘sha paytlarda NATO bilan bir
qator hujjatlar qabul qilindi (masalan, 1995 yilning 16 avgustida
o‘zaro axborot almashuvi munosabatlarini tartibga soluvchi bitim).
O‘zbek harbiylari va NATOchilar hamkorlikda o‘quv yig‘inlari ham
o‘tkazishdi. Shunday yig‘inlardan biri 2003 yilning aprelida Farg‘ona
viloyatida favqulodda holatlarda fuqaro muhofazasi yo‘nalishida
o‘tkazildi. Bularning barchasi Andijondagi hodisalardan keyin bir zumda
yo‘qqa chiqdi. Odatda bahor havosidek tez o‘zgaruvchan siyosat
yuritadigan Toshkent G‘arb davlatlari, jumladan, NATOning tanqidiy
bahosini hazm qila olmadi. Munosabatlar ana shunday boshi
berk ko‘chaga kirib qolgan bir paytda NATO tomoni O‘zbekistonga yana
bir bor imkoniyat berdi, o‘zaro munosabatlarni oydinlashtirib olish
uchun uni ham Buxarest sammitida ishtirok etishga taklif etdi.
Kuzatuvchilar tomonidan yon berish sifatidan baholanayotgan ushbu
qadamni qanday izohlash mumkin? NATOning inson huquqlari borasidagi
tanqidlarga ham qaramasdan nima uchun O‘zbekiston rasmiylari bilan
aloqalarni qayta rivojlantirishga jur'at etyapti? -
Afg‘onistonda hozir oxirgi yillardagi eng og‘ir vaziyat yuzaga kelgan,
- deydi siyosiy tahlilchi Azim Botirov. - Jangarilarning tobora
kuchayib borayotgani va bosh ko‘tarayotgani ustiga narkotik moddalar
tahdidi ham qo‘shilyapti. NATO bunday beqaror va murakkab vaziyatni
bartaraf etishda esa O‘zbekistonning yordamiga umid qilyapti.
Bryusselning barcha tanqidlarni bir chetga surib tavakkal siyosat
yuritayotgani bejiz emas. O‘zbekiston haqiqatan ham strategik jihatdan
juda qulay hududda joylashgan. Afg‘oniston bilan devor-darmiyon qo‘shni
bo‘lgan mamlakatning harbiy koridorlaridan va imkoniyatidan foydalangan
holda ko‘p amaliyotlarni amalga oshirish mumkin. Bu o‘rinda
NATO bilan munosabatlarni yaxshilash uchun O‘zbekiston tomonidan ham
tuzukkina harakat bo‘lganini aytish kerak. Joriy yilning boshida
O‘zbekistonda amnistiya akti bilan bir nechta inson huquqlari
himoyachilari ozod etildi, rasmiy hukumat Xalqaro qizil xoch
qo‘mitasiga qamoqxonalarga kirish uchun ruxsat berdi. Bu kabi yon
berishlar bilan O‘zbekiston tomoni g‘arblik hamkorlarga, jumladan,
NATOga o‘z pozitsiyasini yumshatish uchun yo‘l ochib berdi go‘yo. Ayni
paytda hamkorlik munosabatlarida asosiy qoida Toshkent tomonidan
"diktovka" qilinayotgani aytilmoqda. Biroq bu o‘rinda NATO bilan
hamkorlik O‘zbekiston uchun ham ahamiyatli ekanidan ko‘z yumib
bo‘lmaydi. Afg‘onistondagi vaziyatning yaxshilanishi O‘zbekiston uchun
ham muhim. Nega deganda, amaldagi hukumat Afg‘oniston va u orqali
Pokistondan kelayotgan ekstremizm xatarini kamaytirish uchun baribir
NATO kabi qudratli hamkordan yordam so‘raydi. Islom
Karimovning Buxarest sammitida ishtirok etishi va G‘arb bilan
aloqalarni yaxshilashga urinayotgani Toshkentning Kremldan butkul yuz
o‘girganini anglatmaydi. Chunki O‘zbekiston prezidenti Buxarestga
ketishidan bir necha kun oldin mamlakat parlamenti MDH doirasidagi,
Moskva nazoratidagi Kollektiv xavfsizlik shartnomasi tashkilotiga qayta
a'zo bo‘lish to‘g‘risidiga qonunni ma'qulladi. O‘zbekiston
rahbarining Yevropaga taklif etilishi ayrim inson huquqi himoyachilari
tomonidan tanqidiy baholandi. Ushbu pozitsiya tarafdorlari energiya
resurslari va xavfsizlik kabi masalalar tufa yli demokratiya talabi
ikkinchi planga tushib qoldi degan fikrdalar.
|