 NewsUz - O'zbekistonda
"Forum-TV" nomli sun'iy yo‘ldosh telekanali dasturlari sinov rejimida
efirga uzatila boshladi. Yangi telekanal mamlakatning xalqaro maydonda
nufuzini oshirish, erishilayotgan yutuqlarni ko‘rsatishga xizmat
qilishi kerak. O'zbekiston fazoda o‘z sun'iy yo‘ldoshiga ega emas.
Sun'iy yo‘ldosh ijarasi uchun oyiga 25 ming dollar to‘lanyapti.
O'zbekiston elektron ommaviy axborot vositalari milliy assotsiatsiyasi
va Nodavlat Telekompaniyalar Teletarmog‘i rasman «Forum-TV» telekanali
muassisi sifatida tilga olinmoqda. Aloqa va axborotlashtirish agentligi
esa hukumat vakili sifatida loyihani qo‘llab-quvvatlamoqda. Mazkur
agentlik vakilining ma'lum qilishicha, yangi telekanal mamlakatning
dunyo davlatlari orasida imijini yaxshilashga xizmat qilishi
kutilyapti. Shu bois ham garchi ijara haqi yuqori bo‘lishiga qaramay,
telekanal dasturini sun'iy yo‘ldosh orqali uzatishga harakat
qilinyapti. Ma'naviy-ma'rifiy
yo‘nalishda bo‘lishi kutilayotgan telekanal dasturlari rus, ingliz
tillarida ham efirga beriladi. «Forum-TV» dasturlarini tayyorlash uchun
ijodiy guruh saralanyapti. Hozircha esa efir vaqti nodavlat
telekompaniyalar teletarmog‘ining ikki soatlik dasturi bilan band
qilingan. Rejaga ko‘ra, «Forum-TV»ning efiri «Yoshlar»,
«Sport», «TV-Markaz», NTT kabi telekanallarning eng yaxshi
ko‘rsatuvlari, «O'zbekkino», «O'zbektelefilm» studiyalari mahsulotlar
bilan to‘ldiriladi. Dasturlarni tayyorlash uchun davlat tomonidan
mablag‘ ajratilishi belgilangan. O'zbekiston milliy
teleradiokompaniyasining birinchi kanali dasturlari sun'iy yo‘ldosh
orqali efirga uzatiladi. Biroq mamlakatda hozirga qadar maxsus sun'iy
yo‘ldosh kanali ochilmagandi. «Forum-TV» muassisi bo‘lgan
elektron ommaviy axborot vositalari milliy assotsiatsiyasi 2003 yili
tashkil etilgan. Assotsiatsiya O'zbekistondagi 30 ta telestantsiya, 16
ta radiostantsiya, 28 ta kabel televideniesini birlashtirgan. |
