NewsUz -
Sankt-Peterburg shahrida Kollektiv xavfsizlik shartnomasi tashkiloti
parlament assambleyasining doimiy komissiyasi yig‘ini bo‘ldi. NATOga
raqobatchi deb qaraladigan tashkilot majlisi Buxarest sammiti bilan bir
paytga to‘g‘ri keldi. Ishtirokchilar tashkilotning tinchlikparvar
qo‘shinini tuzish masalasida bosh qotirdilar...
Ruminiyada
o‘tgan majlisda NATO davlatlari Afg‘oniston muammosi va Shimoliy
alyansning sharqqa tomon kengayishi kabi masalalarni muhokama qilgan
edi. Kollektiv xavfsizlik shartnomasi tashkiloti esa bunga javoban
o‘zining tinchlikparvar kuchlarini tashkil etish masalasini kun
tartibiga qo‘ydi. Aslida bu boradagi dastlabki taklif o‘tgan yilning
oktyabrida a'zo davlatlar ishtirokidagi sammitda aytilgan edi. Yig‘inda
tashkilot bosh kotibi Nikolay Bordyuja ham ishtirok etdi. U o‘z
chiqishida KXShTning xavfsizlik borasidagi o‘rnini oshirishga e'tibor
qaratdi. Parlament assambleyasi yig‘inida tashkilotning
tinchlikparvar kuchlarining qonunchilik bazasini ishlab chiqish
masalasi bo‘yicha turli fikrlar tinglandi. Parlament assambleyasi 2006
yilning noyabrida tashkil etilgan bo‘lib, unga a'zo davlatlar
qonunchilik idoralari, jumladan, O‘zbekiston vakillari ham kiradi. Parlament
assambleyasi mashvaratida bir qator muhim masalalar qatori Kosovo
o‘lkasi tomonidan bir tomonlama mustaqillik e'lon qilinishi xalqaro
me'yorlarga zid ekanini ta'kidlovchi bayonot loyihasi ham qabul
qilindi. Shu tariqa KXShT NATO tashkilotining Kosovo mustaqilligi
borasidagi pozitsiyasiga ham qarshi munosabatini bildirib qo‘ydi. Kollektiv
xavfsizlik shartnomasi tashkilotiga 1992 yilning 15 mayida Toshkentda
Rossiya, Armaniston, Qozog‘iston, Qirg‘iziston, Tojikiston va
O‘zbekiston vakillari tomonidan asos solingan. Keyinroq tuzilmaga
Ozarboyjon, Gruziya va Belorus qo‘shildi. 1999 yili tashkilotdan
O‘zbekiston bilan birga Gruziya, Ozarboyjon ham chiqqandi. 2006 yilning
13 dekabrida mamlakat rahbari Islom Karimov imzolagan hujjatga ko‘ra,
O‘zbekiston KXShTga a'zolikni tiklashni rasman e'lon qildi. |