NewsUz - Bugun Ashxabodda Yevropa Ittifoqining yuqori lavozimdagi vakillari va
Markaziy Osiyo tashqi ishlar vazirlari o‘zaro munosabatlar
strategiyasini muhokama etishadi. Shu munosabat bilan memorandum qabul
qilgan Human Rights Watch tashkiloti mintaqadagi muammolarga e'tibor
qaratdi.
- Yevropa Ittifoqi Markaziy Osiyo davlatlari
uchun inson huquqlari borasida maqsadli ko‘rsatkichlarni
shakllantirishi kerak va ular ijrosi mintaqadagi strategiyada muhim
kalit vositaga aylanishi zarur, - deyiladi 8 aprel kuni tarqatilgan memorandum da. 9-10
aprel kunlari Ashxabod shahrida o‘tadigan yig‘in Yevropa Ittifoqning
Markaziy Osiyo davlatlari bilan kelgusi aloqalarida muhim o‘rin tutishi
mumkin. Ushbu yig‘inda YeI tashqi aloqalar komissari Benita
Ferrero-Valdner, YeIning amaldagi prezidenti Sloveniya tashqi ishlar
vaziri Dmitriy Rupel, Frantsiya tashqi ishlar vaziri Bernard Kushner va
YeIning Markaziy Osiyo bo‘yicha maxsus vakili Per Morel ishtirok etadi.
YeI Markaziy Osiyo uchun 2007 yilning iyunida strategiya qabul
qilgan. Strategiyada Yevropa Ittifoqining Markaziy Osiyo bilan
energetika, xavfsizlik va boshqa siyosiy masalalardagi munosabatiga
e'tibor qaratilgan. - Aniq talablarning qo‘yilishi strategiyaga
to‘g‘ri yo‘nalish tanlashga yordam beradi, - deydi Xyuman Rayts
Votchning Yevropa va Markaziy Osiyo bo‘yicha direktori Xolli Kartner. -
Markaziy Osiyoning aksariyat davlatlari postsovet makonidagi eng
repressiv tuzumlardan sanaladi. Yevropa Ittifoqi vaziyatni yaxshilash
uchun ushbu imkoniyatdan samarali foydalanishi kerak. Xyuman
Rayts Votch 15 sahifalik memorandumda mintaqaning har bir davlati
bo‘yicha o‘z qarashini ilgari suradi. Xususan, tashkilot mintaqadagi
fuqarolik jamiyati vakillari bilan doimiy aloqa o‘rnatish va ular bilan
muloqotda bo‘lish kerakligini aytadi. Oxirgi paytlarda mintaqa
davlatlari, xususan, O‘zbekistonda inson huquqlari himoyachilari
amnistiya bilan ozod etilgani kuzatildi. "Ushbu o‘zgarishlar
albatta, olqish va e'tirofga loyiq. Lekin bu holat Markaziy Osiyoning
alohida davlatlari va umuman mintaqadagi inson huquqlari bilan bog‘liq
ayanchli holatni yaxshilashga olib kelmaydi", deydi X.Kartner. Keyin esa tashkilot mintaqaning har bir davlatida inson huquqlari bilan bog‘liq muammolarni sanab o‘tadi. O‘zbekiston
masalasida tashkilot YeIdan adolatsiz qamoqqa tashlangan huquq
himoyachilarini ozod qilish, fuqarolik jamiyatiga bosim o‘tkazishni
to‘xtatish uchun amaliy yordam so‘raydi. - YeIning Markaziy Osiyo,
jumladan, O‘zbekistonga nisbatan iliq munosabatini boshqa inson
huquqlari tashkilotlari ham salbiy qabul qilayotganidan ko‘z yumib
bo‘lmaydi, - deydi mahalliy kuzatuvchi Azim Botirov. - E'tiroz asossiz
emas. YeIning katta rahbarlari strategik masala sanalgan energetika
deya inson huquqlari masalasiga ikkinchi darajali hodisa sifatida
e'tibor qaratmoqdalar. Yaqin kunlardan YeI rahbariyati Andijon
voqealaridan keyin O‘zbekistonga nisbatan joriy etilgan sanktsiyalar
masalasini muhokama etadi. O‘tgan yili ushbu jazo chorasi vaqtincha
to‘xtatilgan edi. Endi bu boradagi Bryussel so‘nggi qarorini bildirishi
kerak. Sanktsiyalar masalasida munosabat bildirgan Xyuman Rayts Votch
YeIni mamlakatdan islohotlar olib borishni talab qilish, inson
huquqlari borasidagi ahvol o‘nglanmagunga qadar sanktsiyalarni saqlab
turishni samarali yo‘l sifatida keltiradi. |