Senator-direktor g‘oyib bo‘ldi NewsUz - O‘zbekistondagi
eng boy zavodlardan biri Navoiy tog‘-metallurgiya kombinati rahbari
Nikolay Kucherskiy Moskva shahriga qochib ketdi, deb yozadi Uzmetronom
nashri. O‘zbekiston qahramoni va senator kabi oliy rutbalarga ega
bo‘lgan bosh direktor bir qator jinoyatlarda gumon qilinyapti.
Navoiy
tog‘-metallargiya kombinatidagi moliyaviy tekshiruv 2007 yilning
oxiridi boshlangandi. O‘shandayoq kombinatning bir qator amaldorlari
qatori bosh direktor Nikolay Kucherskiyning o‘zi ham gumon ostida
qolgan edi. Ayrim xabarlarga qaraganda, joriy yilning martida
Navoiy kombinatining bir qator yuqori lavozimli amaldorlari o‘z ish
kabinetida hibsga olingan. Ular valyuta shartnomalarini buzish, davlat
mablag‘larini o‘zlashtirish va boshqa jinoyatlarda ayblangan. Aftidan,
mazkur tekshiruv yakunlanib, navbat katta rahbarga ham yetgan
ko‘rinadi. Harqalay, qahramon direktorning kutilmaganda ish joyini
tashlab Rossiyaga poytaxtiga ravona bo‘lishi ana shundan dalolat
berayotgandek. Kucherskiy qochib ketgani xususida xabar tarqalgan bo‘lsa-da, Navoiy tog‘-metallargiya kombinatining rasmiy saytida
tashkilot rahbari sifatida hali ham Kucherskiy Nikolay Ivanovich nomi
ko‘rsatilgan. Birinchi rahbarning saytdagi har bir sahifaga kiritilgan
suratlari ham hali olib tashlanmagan. Ehtimol, rahbar bir lahzada
g‘oyib bo‘lganidan o‘zini yo‘qotib qo‘ygan kombinat ma'muriyati yodiga
Kucherskiy nomini olib tashlash hali kelmagandir. Ehtimol... Nikolay
Kucherskiy 1961 yili Dnepropetrovsk tog‘ institutini tamomlagan. Shu
yildan e'tiboran Uchquduqda mehnat qilgan. O‘tgan vaqt davomida turli
lavozimlarda ishlagan injener-shaxta quruvchi 1985 yili Navoiy
tog‘-metallurgiya kombinatiga direktor etib tayinlangan. Texnika
fanlari doktori, professor, bir qator akademiyalar a'zosi. Amaldagi
davlat rahbarining ishonchli kadrlaridan biri deb aytiladigan arbob
olmagan unvon, ega bo‘lmagan mukofot va orden, medal kam topiladi.
Kucherskiy hatto Amerika biografiya instituti tomonidan 2000 va 2002
yillarda yil odami deb e'lon qilingan. O‘zbekistonda g‘azabga
uchragan yoki jinoyatda ayblanayotgan amaldorlarning xorijga qochib
ketishi ko‘p uchraydi. Lekin amaliyotda agar mamlakat rahbariyati
jiddiy harakat qilsa, qochoqni qaytarib keltirish mumkinligi sinalgan.
Masalan, bir necha yil oldin davlat mulkini talon-taroj qilishda
ayblangan O‘zbekiston havo yo‘llari kompaniyasi rahbari Arslon
Ro‘zmetov ham Moskvaga qochib ketgandi. To‘g‘ri, u bir necha yil
davomida Moskavadagi aeroportlardan birida direktor o‘rinbosari bo‘lib
ham ishladi. Lekin kerak paytida u ushlab O‘zbekistonga olib kelindi va
keyinroq ozodlikdan mahrum etish muassasasida vafot etdi. Shu ma'noda Moskvani N. Kucherskiy uchun so‘nggi qochish maskani deyish biroz erta
|