«Zeromax GmbH» kompaniyasi O'zbekistonda
NewsUz «Zeromax
GmbH» kompaniyasi Buxoro-Xiva hududida neft va gaz qidiruv amaliyoti
uchun litsenziya oldi. Loyiha xarajati 238,7 million dollar atrofida.
Rasman Shveytsariyada ro‘yxatdan o‘tgan mazkur kompaniya aslida
O‘zbekiston prezidentining qizi Gulnora Karimova nazoratida ekani
aytiladi.
Reuters agentligi xabariga ko‘ra,
kompaniyaga geologik tekshiruvlar olib borishga ijozat berish borasida
hukumat qarori ham qabul qilingan. Ushbu qarorda Zeromax kompaniyasi
2008-2012 yillarda O‘zbekistonning g‘arbiy va markaziy hududlarida
qidiruv, razvedka ishlari olib borish huquqi beriladi. Mazkur hududdagi
konlarda 102 million tonnaga yaqin energiya manbasi bo‘lishi mumkin. Kompaniyaning sho‘'ba korxonalaridan biri bo‘lgan «UzGazOil» geologiya qidiruv ishlarida operator vazifasini bajaradi. O‘zbekistonda
1999 yildan beri faoliyat yuritib kelayotgan «Zeromax» kompaniyasiga
mamlakatdagi neft-gaz, oziq-ovqat, to‘qimachilik, elektrotexnika,
qurilish kabi sohalarda ish olib boradi. Xususan, kompaniya oxirgi
paytlarda O‘zbekistonning strategik hamkorlik sohasi bo‘lib qolgan
neft-gaz yo‘nalishida juda katta loyihalarni amalga oshiryapti. Ushbu
yo‘nalishda kompaniyaning o‘nga yaqin sho‘'ba korxonalari ish olib
boradi. Ayrim tahlilchilar neft-gaz sohasidagi barcha bitimlar ushbu
kompaniya orqali amalga oshirilayotgani, "O‘zbekneftegaz" milliy
xolding kompaniyasi ham «Zeromax» iznisiz katta bitimlarni imzolay
olmay qolganini aytishadi. O‘zbekistonda oltin qazib olish
sohasida faoliyat yuritgan Buyuk Britaniyaning «Oxus Gold plc»
kompaniyasiga tegiishli 29,9% ulush ham «Zeromax» tomonidan olingani
ta'kidlanadi. O‘zbekiston Markaziy Osiyo hududidagi eng yirik
neft va gaz zaxirasiga ega bo‘lgan davlatlardan biri. Deylik,
mamlakatning yillik gaz qazib olish ko‘rsatkichi 62 milliard kubometri
tashkil etadi. Bu boradagi yirik loyihalarni amalga oshirishda esa
«Zeromax» kompaniyasi asosiy tashkilotchi va muvofiqlashtiruvchi
vazifasini bajaradi.
|