Main » 2008 » Апрель » 20 » Sobiq militsionerning qochishi sabab quyidagicha
Sobiq militsionerning qochishi sabab quyidagicha
20.12
Sobiq militsionerning qochishi sabab
quyidagicha NewsUz Militsiya
podpolkovnigi, Angren shahar ichki ishlar bo‘limi rahbarining sobiq
o‘rinbosari Shuhrat Abdullaev O'zbekiston bosh prokuraturasi
tergovchisi xonasining derazasidan xuddi bezorilardek sakrab qochdi va
tuzukkina jarohatlandi ham. Sobiq militsionerning qochishi sabab
quyidagicha.
Angren shahar ichki ishlar bo‘limi
rahbari o‘rinbosari bo‘lib ishlagan, keyinroq ishdan haydalgan Shuhrat
Abdullaev bilan bog‘liq voqea region.uz saytida e'lon qilingan maqolada tilga olingan.
Shunday qilib, sobiq podpolkovnik ikki qo‘li va oyoqlari sinib,
jabrlanuvchiga aylanib qoldi va Toshkent tibbiyot akademiyasi
klinikasiga keltirildi. Turgan gap, bu voqea demokratik ko‘rinishidagi
tomoshaga turtki bo‘ldi. Shuhrat Abdullaevning ukasi Oybek akasining
boshiga tushgan voqeadan qattiq ta'sirlanib, Angren shahrida
yashaydigan bir guruh qarindoshlarini o‘z atrofiga to‘pladi.
Shu yilning 24 mart kuni soat 23 larda sakkiz kishi sobiq
podpolkovnikni ozod etishni talab qilib, respublika Bosh prokuraturasi
binosiga bostirib kirmoqchi bo‘lishdi. Ular plastik idishlar va benzin
to‘ldirilgan kanistrni ko‘tarib olishgan edi. Qarindoshlar oynalarni
sindirib, o‘zlarini yoqib yuborishlarini aytib, tahdid qila boshlashdi.
Albatta, ularning hech biri o‘z joniga qasd qilmoqchi emas
edi. Bu shovqin-suron odamlarning diqqatini jalb etish niyatida
uyushtirilgandi. Lekin bu ish kutilgan natijani bermadi.
To‘polonchilarni ushlab, Toshkent shahar Mirzo Ulug‘bek tuman Ichki
ishlar boshqarmasiga keltirishdi. Hozir esa ularni javobgarlikka
tortish masalasi ko‘rilmoqda...
Endi esa Angren shahar ichki
ishlar bo‘limi rahbari o‘rinbosarining militsiyadan ishdan
bo‘shatilishi sabablariga oydinlik kiritsak. 2003 yilning may oyida
Toshkent viloyatining Angren shahrida sakson yoshli chol - Shukur
Abdullaev o‘ldiriladi. Cholning jasadini o‘z uyidan, qo‘l-oyoqlari
bog‘liq holda topadilar.
Shahar prokuraturasi shu zahoti
ushbu jinoyat ishi bilan shug‘ullana boshladi. Lekin muammo yuzaga
keladi. Chunki qotillar jinoyat ustida ushlanmagan, qolaversa,
jinoyatchilar bironta iz ham qoldirmagan edi. Xuddi shu paytda ichki
ishlar xodimlari T.Misheva ismli qizni zo‘rlashda gumon qilinayotgan
bir guruh yosh yigitlarni qo‘lga olishadi. Ularning hammasi voyaga
yetmagan o‘spirinlar edi. R.Shodiev, D.Motkin, T.Qodirov, D.Smailov va
D.Romachev keltirilgan dalillar va jabrlanuvchi ko‘rsatmasiga ko‘ra,
o‘z ayblariga iqror bo‘lishadi. Mana shunda janob podpolkovnik shahar
prokuraturasidagi hamkasblarini qoyil qoldirmoqchi bo‘lib,
shaxmatchilar iborasi bilan aytganda "ot bilan olg‘a yuradi". Beshala
zo‘ravonga militsiyada yaxshilab "ishlov berishib", qotillikni ham
bo‘yinlariga qo‘yishadi. Chunki podpolkovnik o‘z shahrida og‘ir
jinoyatlarni ochishga oid ko‘rsatkichni yaxshilamoqchi edi.
O'spirinlarga esa qasddan emas, ehtiyotsizlik orqasidan qotillik yuz
bergan degan modda qo‘llaniladi, deb aytishadi.
Lekin,
Toshkent viloyat sudi yigitchalarning ko‘rsatmalarini yetarli emas deb
topadi va qotillik haqidagi ishni tergovga qaytaradi. SIZO ga
qaytguncha yigitchalar podpolkovnik buyrug‘iga ko‘ra, yana bir marta
"kuchli ishlov" dan o‘tishadi. Bunga chiday olmagan Shodiev va Romachev
kamerada qon tomirlarini kesishadi.
2004 yil yanvarida
shahar prokuraturasi qotillikda yigitchalarning ishtiroki
isbotlanmagani sababli tergov ishini to‘xtatdi. 2004 yil sentyabrida
viloyat prokuraturasi Angren shahar prokuraturasi qarorini bekor qilib,
yana cholning o‘limi yuzasidan tergov boshladi. Va xuddi shu paytda
g‘alati tafsilotlar yuzaga chiqa boshladi. Aniqlanishicha, 2003 yil
dekabrida Angren shahar ichki ishlar bo‘limi tergovchisi Ibrat Hotamov
ko‘chada 21 yoshli Mixail Norqulovni "Jinlupi" televizori ko‘tarib
ketayotgan paytda ushlaganligi ma'lum bo‘ladi. Norqulov qonunni buzgani
uchun muqaddam sudlanib, bir yil muddatga ahloq tuzatish ishlariga hukm
qilingan edi.
"Cholning o‘limi to‘g‘risidagi ishda mana
shunday televizor to‘g‘risida gap borgan edi", - deb eslaydi Ibrat
Hotamov va Mixailni to‘xtatadi. Mixail televizor opamniki edi, deb
o‘zini oqlay boshlaydi. Lekin televizor Mixailning opasiga tegishli
emasligi aniqlanadi. Shundan keyin tergovchi uni ichki ishlar bo‘limiga
olib keladi. So‘roq paytida Norqulov o‘z sherigi kimligini aytib
beradi.
Televizor o‘g‘risining sherigi 27 yoshli Artyom
Ovcharov bo‘lib, Ohangaron o‘rmon xo‘jaligida montyor-elektrik bo‘lib
ishlar, xotini va farzandi bor edi. Artyom oilasini ta'minlash uchun
pul kerak bo‘lganini aytib, o‘zini oqlay boshlaydi. U Shukur
Abdullaevning qizi bilan bir joyda ishlar ekan. Ma'lum bo‘lishicha,
Artyom ishxonada tasodifan ayol bilan so‘zlashib qoladi va undan keksa
otasi yolg‘iz yashashini bilib oladi. Jinoyatchilarning so‘zlariga
ko‘ra, ular faqat o‘g‘irlik qilishmoqchi bo‘lgan, xolos. Lekin chol
uyg‘onib qoladi. Shundan keyin Mixail va Artyom Sh.Abdullaevning
oyoq-qo‘lini bog‘lab, yordamga chaqirmasin deb, og‘ziga latta
tiqadilar. Bechora chol nafasi qaytib jon beradi.
Lekin
militsiya ofitseri haqiqiy jinoyatchilarni yashirishga qaror qiladi.
Ehtimol, u bir guruh yigitchalar sodir etgan va bo‘limdagilar "fosh"
qilgan qotillik sabab, rahbariyatdan rag‘bat kutgandir? Shu tariqa,
muhim ashyoviy dalil g‘alati tarzda g‘oyib bo‘ladi.
Oyni
etak bilan yopib bo‘larmidi? Natijada Ovcharov va Norqulov
qilmishlariga yarasha jazo olishdi. Podpolkovnik Shuhrat Abdullaev esa
2006 yilda jinoyatni yashirishda gumon qilinib, qo‘lga olindi va uch oy
tergov izolyatorida yotdi. Ammo "Jinoyat alomatlari yo‘q" ligi uchun
hibsdan ozod etildi.
Oradan bir yil o‘tib, sobiq
podpolkovnik O'zbekiston Respublikasi Ichki Ishlar vazirligi va Bosh
prokuraturasiga ariza yozib, ichki ishlar organlariga ishga
tiklashlarini so‘raydi. Rad javobi olgandan keyin esa O'zbekiston
Prezidenti devoniga ariza yozadi.
Uning bu ishini
hamkasblari kechirishmadi. Chunki ular bir vaqtlar uning jinoiy ishini
yopib yuborishgan edi. Ha, podpolkovnik ariza yozib, xato qildi,
deyishdi ular, uyida tinchgina o‘tirsa bo‘lardi. Yo‘q, u o‘zicha
haqiqatni izlamoqchi bo‘ldi. Bo‘yniga qotillikni qilmoqchi bo‘lgan besh
o‘spirinning taqdiri-chi? Kim biladi, agar haqiqiy qotillar tasodifan
topilmaganda, yana qanchalab yolg‘iz keksalar o‘z uylarida o‘lik holda
topilarmidi...
Xullas, qo‘l-oyoqlari sinib, turma shifoxonasida yotarkan, sobiq podpolkovnik o‘z qismati haqida o‘ylashga fursat topadi.
Qolaversa, militsiyaga mana shunday soxta statistika ortidan quvadigan,
o‘z mansabi yo‘lida o‘zgalar hayotini qurbon qilib yuboradiganlar
kerakmikin
Views: 1029 | Added by: himoyachi | Rating: 0.0/0 |
