"Ezgulik" jamiyati bilan
nomdosh boshqa tashkilotni ro‘yxatga olgan bo‘lishi mumkin NewsUz - Adliya vazirligi O'zbekiston inson huquqlari "Ezgulik" jamiyati bilan
nomdosh boshqa tashkilotni ro‘yxatga olgan bo‘lishi mumkin. Agar ushbu
taxmin tasdiqlansa, adliya idorasi "Nodavlat notijorat tashkilotlari
to‘g‘risida"gi qonun talabini buzgan bo‘lib chiqadi. Jamiyat
vakilining ma'lum qilishicha...
O'zbekiston Milliy
axborot agentligi shu yilning 14 aprelida Qashqadaryo viloyatida
"Ezgulik" ayollarni qo‘llab-quvvatlash markazi ish boshlagani haqidagi
xabar tarqatdi. Ma'lum bo‘lishicha, Xotin-qizlar qo‘mitasi hamda
Qashqadaryo viloyati hokimligi tomonidan tashkil etilgan nodavlat
notijorat tashkilot ayollarga ijtimoiy-huquqiy yordam ko‘rsatish,
ularning oila va jamiyatdagi mavqeini oshirishni maqsad qilgan.
Agentlik muxbiri A. Muhammadiev tashkilot rahbari Xalfiya Davletova
bilan suhbat qurarkan, suhbatdosh markazning respublika bo‘ylab
kengayishini ta'kidlaydi. Bu xabar "Ezgulik" jamiyatini hayron
qoldirdi. Chunki mamlakat qonunchiligiga ko‘ra, bir nomdagi nodavlat
tashkilotining ikkinchi marta ro‘yxatga olinishi mumkin emas. Bu masalada jamiyat Adliya vazirligining Jamoat tashkilotlarini ro‘yxatga olish boshqarmasiga murojaat qildi. Boshqarma
boshlig‘i Jalol Abdusattorov esa jamiyat rahbari Vasila Inoyatovaga
vaziyatni Qarshidagi "Ezgulik" huquqiy markaz, ularniki esa jamiyat
ekani bilan izohlagan. Jamiyat rahbariyati esa markazmi, jamiyatmi -
bular umumiy tarzda nodavlat tashkilot deb atalishi va ularni bir nom
bilan ro‘yxatga olinmaydi degan fikrda. Qiziq jihati,
Qashqadaryo viloyati Adliya boshqarmasi ularda bunday nomdagi tashkilot
umuman ro‘yxatga olinmaganini ma'lum qilgan. O'zbekiston Milliy axborot
agentligi esa bu boradagi ma'lumotlar mutasaddi idoralardan olingani,
ularning qo‘lida barcha tegishli hujjatlar mavjudligini qayd etgan.
Shu munosabat bilan "Ezgulik" jamiyati Adliya vazirligi rahbariyatidan
mazkur qonun buzilishi holatiga izoh berishni so‘ragan. Aksincha
holatda esa adliya ro‘yxatga olmagan tashkilot faoliyati haqida rasmiy
xabar chop etgan Milliy axborot agentligining raddiya berishini
kerakligini eslatgan. Jamiyat vakili nohukumat, notijorat
tashkilotlarning ko‘payishi tarafdori ekani, raqobatdan cho‘chimasligi,
ayni paytda bir nom bilan ikki tashkilotning ro‘yxatga olinishi ortida
g‘arazli maqsad, fitna bo‘lishi ehtimolini e'tirof etgan. 2003
yilning mayida tashkil etilgan «Ezgulik» jamiyati mamlakatda rasman
ro‘yxatdan o‘tgan sanoqli nodavlat tashkilotlardan biri.
|