NewsUz. Kecha 27 aprel kuni Toshkentga Kollektiv xavfsizlik shartnomasi tashkiloti bosh kotibi Nikolay Bordyuja keldi. Tashrif arafasida tashkilot bosh kotibi O‘zbekiston rahbariyati bilan xavfsizlik borasida chuqurroq muhokama qilish kerak bo‘lgan mavzular borligiga ishora qilgan. Uchrashuvlar shu maqsadda o`tkazildi.

Tashkilot matbuot kotibi Vitaliy Strugovetsga ko‘ra, tashrif davomida O‘zbekistonning yuqori lavozimdagi rahbarlari bilan uchrashuvlar o‘tkazilishi belgilangan.

Xabarlarga qaraganda, bosh kotibni O‘zbekiston tashqi ishlar vaziri Vladimir Norov, mudofaa vaziri Ruslan Mirzaev, Milliy xavfsizlik kengashi bosh kotibi Murod Ataev va boshqa bir qator rasmiylar qabul qilgan.

Rasmiy munosabatga ko‘ra, tomonlar har galgidek terrorizm, narkotikaga qarshi kurash hamda xalqaro xavfsizlikka doir boshqa masalalarni muhokama etishgan.

So‘nggi paytlarda O‘zbekistonning G‘arb harbiy tashkilotlari, xususan, NATOning bilan aloqalari tobora yaqinlashib borayotgani kuzatilyapti. O‘zbekiston rahbari bir necha yillik tanaffusdan keyin Ruminiyada o‘tgan NATO majlisida ham ishtirok etdi. Bu esa Rossiya hamda eski ittifoqchi kuchlarning xavotiriga sabab bo‘lyapti. Tahlilchilar ko‘ra, Nikolay Bordyujani Toshkentga yetaklagan kuch ham ana shu xavotir va tashvish tuyg‘usidir. Nikolay Bordyuja O‘zbekiston rahbariyati bilan jiddiy tartibda muhokama etadigan masalalar mavjudligini aytganda ham ana shu jihatga e'tiborga olgan bo‘lishi mumkin.