Ittifoqchi nemislar ham taajjubda
30.04.2008 y.
NewsUz. Lyuksemburgda
mashvarat o‘tkazgan Yevropa Ittifoqi mamlakatlari kutilgandek
O‘zbekiston rasmiylariga joriy etilgan viza cheklovini yana olti oyga
to‘xtatishga qaror qilishdi. Bu qarorni nemis matbuoti, xususan, Frankfurter Allgemeine gazetasi paradoksal holat deb baholadi...
Nemis
gazetasi sanktsiyalar amalda bo‘lgan 2,5 yil davomida hech narsa ayrim
o‘zgarishlar ro‘y berganiga taajjub bildiradi. Ushbu holat Yevropa
rasmiylariga kuch berayotgan, ularni o‘z qarorini to‘g‘ri deb
dastaklashga asos bo‘layotgan jihat. Lekin ayni paytda xalqaro
tashkilotlar, deylik, Human Rights Watch yuz bergan o‘zgarishlar
unchalik ham ko‘zga tashlanarli emasligi, sanktsiyalarni amalda
qoldirish kerak degan pozitsiyada. Joriy yilning
fevralida O‘zbekistonda bir necha inson huquqi himoyachisiga qamoq
eshiklari ochildi. Bu holat esa Yevropa tomonidan ijobiy o‘zgarish
sifatida qabul qilindi. Human Rights Watch esa
hali ham eng kamida 12 nafar inson huquqlari himoyachisi qamoqda
qolayotgani, hozir ham ozodlikdagi sanoqli huquq faollariga bosim
bo‘layotganini ta'kidlaydi. Shu bilan birga tashkilot ozodlikka chiqqan
siyosiy mahkumlar shunchaki uyiga qo‘yib yuborilmagani, ularga avf xati
yozish hamda huquq himoyasi borasidagi faoliyatini to‘xtatish sharti
qo‘yilganiga e'tibor qaratadi. Ana shundan kelib chiqib, xalqaro
tashkilot YeIning viza cheklovini yana olti oyga to‘xtatish qarorini
ham Toshkentga yon bosish deb baholagan. Nemis
gazetasiga ko‘ra, O‘zbekiston sanktsiyasi masalasida Yevropaning barcha
davlatlari ham bir fikrda emas. Masalan, Shvetsiya va Niderlandiya viza
cheklovi to‘xtatilsa-da, uch oydan keyin yana tekshirishni talab qilgan.
Yevropa diplomatlari o‘zbek rahbariyatidan inson huquqlari borasida
talablarni quchoq ochib qabul qilishni kutyapti. Lekin bunday munosabat
baribir ramziy xarakterga ega bo‘ladi, deb xulosa qiladi Frankfurter
Allgemeine nashri. Germaniya O‘zbekistonning
Yevropa Ittifoqidagi eng yaqin hamkori. Termez shahrida o‘z harbiy
bazasiga ega bo‘lgan mamlakat YeIning boshqa a'zolarini sanktsiyalarni
bekor qilishga ko‘ndira olgan
|