|
Kiem - Lyuksemburgda Yevropa Ittifoqi Kengashi yig'iladigan markaz |
Yevropa Ittifoqi huquq talabini qo'ymoqda, sanksiyalar qisman kuchda qoladi
Yevropa Ittifoqi O’zbekistonga nisbatan 2005 yil so’nggida qo’yilgan sanksiyalarni yana olti oyga bekor qilishga qaror qilgan.
Ya’ni respublikaning ayrim rasmiylarini ittifoqqa safar qilishini
cheklovchi qoidalar vaqtincha olib tashlangan va hozircha
shundayligicha qoladi.
Ammo Yevropa Ittifoqiga a’zo davlatlardan O’zbekistonga qurol-aslaha sotish hamon man etilgan.
Sanksiyalarning yana yarim yilga bekor qilinishining asosiy sharti,
deyiladi Yevropa Ittifoqi Kengashi bayonotida, O’zbekistonda inson
huquqlari bilan bog’liq ahvol yaxshilanishi kerak va Islom Karimov
rahbariyati xalqaro majburiyatlarga sodiq ekanini isbotlashi lozim.
Yevropa Ittifoqi nazarida o’tgan oylar mobaynida respublikada huquq va erkinlik bobida qator ijobiy qadamlar tashlangan.
Jumladan, o’lim jazosi bekor qilingan; qamoqqa olish vakolatini endi
faqat sudlar beradi; bolalar mehnatini cheklovchi xalqaro qonun
ratifikatsiya qilingan. Shuningdek, inson huquqlari faollari -
Saidjahon Zainobiddinov, Ixtiyor Hamroyev, Ulug’bek Kattaboyev va
Bobomurod Mavlonovlar qamoqdan ozod etilgan. Gulbahor To’rayeva va
Umida Niyozovalarga berilgan jazolar yengillashtirilgan.
Xalqaro Qizil Xoch Qo’mitasiga mamlakat turmalarga kirish uchun
ruxsat berilgani ham Yevropa rasmiylari tomonidan ijobiy o’zgarish deya
qayd etilmoqda.
Biroq, Yevropa Ittifoqi Kengashiga ko’ra, O’zbekistonda erkinlik
ravnaq topishi uchun rahbariyat yana ko’plab choralar ko’rishi va
qarorlar qabul qilmog’i lozim.
Talablar: qiynoqlarga barham berish, mahbuslarning huquqlarini
hurmat qilish, huquq faollariga nisbatan tazyiqlarni bas qilish, inson
huquqlarini himoya qiluvchi mahalliy va xalqaro tashkilotlarga
mamlakatda faoliyat yuritish uchun yo’l berish, BMT bilan qiynoqlarga
qarshi kurash hamda matbuot va so’z erkinligi yo’lida hamkorlik qilish,
nohukumat tashkilotlarni ro’yxatga olish va ularga qo’yilgan
cheklovlarni bekor qilish va hokazo.
Huquq tashkilotlari, xususan Xalqaro Amnistiya Yevropa Ittifoqini
sanksiyalarni yumshatmaslikka, aksincha, Karimov ma’muriyatiga
keskinroq talablar qo'yishga chaqirgan va huquq e’zozlanishi
kafolatlanmaguncha cheklovlar amalda qolsin deya so’ragan edi.
|