O’lim o‘rniga qamoq jazosi

NewsUz. O'zbekiston Oliy sudi o‘lim jazosiga hukm qilingan mahkumlar ishini qayta ko‘ra boshladi. Mamlakatda joriy yilning birinchi yanvaridan "O'lim jazosini bekor qilish to‘g‘risida" qonun kuchga kirdi. Bu esa avvalroq ushbu jazoga hukm etilganlar jinoiy ishini boshqatdan ko‘rib chiqishni taqozo etadi.

Qonun qabul qilingunga qadar o‘limga hukm etilganlar jazosi umrbod yoki 20-25 yillik qamoq jazosi bilan almashtirilishi zarur. Ferghana.ru saytining O'zbekistondagi "Onalar o‘lim jazosiga va qiynoqlarga qarshi" nodavlat tashkiloti rahbari Tamara Chikunovaga tayanib xabar berishicha, hozirgacha o‘n yettita o‘lim jazosi qayta ko‘rib chiqildi. Ularning barchasiga oldin belgilangan o‘lim jazosi  20-25 yilga ozodlikdan mahrum etish bilan alishtirildi. Mazkur mahkumlar Toshturmaning "o‘lim" kamerasidan Andijon, Urganch, Nukus, Qarshi, Navoiy shaharlar koloniyalaridagi turmalarga qolgan jazoni o‘tash uchun jo‘natilmoqda.

Ma'lum bo‘lishicha, sud oliy jazoni avtomatik ravishda umrbod qamoq jazosiga almashtirmay, har bir ishni alohida ko‘rib chiqmoqda, yengillashtiruvchi va og‘irlashtiruvchi holatlarni e'tiborga olmoqda.

Nodavlat tashkiloti rahbari shu choqqacha "O'lim jazosini bekor qilish to‘g‘risida" qonunni huquqiy qo‘llash amaliyoti nashr etilmaganini hasrat bilan qayd etgan. Shuning uchun ham Oliy sud jinoyat ishlarini qayta ko‘rayotganida nimalarga asoslanib hukm chiqarayotgani borasida xulosa chiqarish qiyin bo‘lmoqda. Ishlari qayta ko‘rib chiqilayotgan mahkumlarning keyingi taqdiri borasida ham noaniqliklar ko‘p.