Rishton: obi hayot istab... NewsUz.Com. Yoz
yaqinlashishi bilan Farg‘ona viloyatining Rishton tumani aholisini
tashvish bosadi: suv sotish olish kerak! Kuz va bahor mavsumida aholi
ichish uchun amallab yomg‘irni g‘amlab oladi. Yozda esa yomg‘ir suvini
topish ham muammoga aylanadi. Osmon uzoq, yer qattiq... O‘zbekiston mustaqil inson huquqlari tashabbuskor guruhi tarqatgan ma'lumot
ga ko‘ra, ayni paytda tuman aholisi qo‘shni Qirg‘iziston hududidan
keltirilgan suvni sotib olishga majbur. Suvning chelagi o‘rtacha 100
so‘m turadi. Kundalik ehtiyoj uchun esa har bir oilaga kuniga 12-13
chelak suv kerak bo‘ladi. Shu tariqa faqatgina ichimlik suvi xaridi
uchun har bir oila oyiga 39-40 ming so‘m sarflaydi. Rishtonning
Amirobod qishlog‘ida istiqomat qiluvchi otaxon 1992 yildan beri
ichimlik suvi yo‘qligini aytadi. Suhbatdoshning ma'lum qilishicha,
odamlar oldinlari ariq suvini tindirib ichishardi. Endi esa ariqlarda
ham suv yo‘q. Tumanning ayrim hududlariga kranlar yetib borgan. Lekin
kranlar suv ko‘rmaganiga ko‘p zamonlar bo‘ldi. Bu holatni tuman suv
kanali xodimlari suvni qayta ishlash uchun energiya kerakligi,
energiyadan esa qarz ko‘pligiga yo‘yadi. Aslida tuman hududida
yer osti grunt suvlari ko‘p. Lekin bu omil umumiy vaziyatga ijobiy
ta'sir etmaydi. Nega deganda, grunt suvlari ko‘p hollarda yer ostidagi
chiqindilar bilan aralashib ketadi. Va ularni hatto ekin uchun ham
ishlatib bo‘lmaydi. Aksariyat mutaxassislar muammoni hal etish
uchun drenajlar qurish, grunt suvlarini tortib olib, daryoga oqizish
kerakligi aytishadi. Lekin drenajlar uchun ham katta miqdorda elektr
energiya kerak. Energiya esa Farg‘ona viloyatida aholining asosiy
ehtiyojlariga ham yetmayapti. Rishton Farg‘ona viloyatining aholi tez ko‘payayotgan tumanlaridan biri. Hududda 157,4 ming kishi istiqomat qiladi.
|