26.05.2008 y.
NewsUz  - Human Rights Watch O‘zbekistonda hali-beri o‘z faoliyatini boshlamaydi. Tashkilotning O‘zbekistondagi vakolatxonasi rahbari Igor Vorontsov bu haqda ma'lum qildi. Xalqaro tashkilot shu munosabat bilan Yevropa Ittifoqi davlatlari tashqi ishlar vazirlariga maxsus maktub ham yo‘lladi.

Ushbu maktubda tashkilot YeI rasmiylarini O‘zbekistonga nisbatan joriy etilgan va joriy yilning aprelida vaqtincha to‘xtatilgan sanktsiya masalasini qayta ko‘rib chiqishga chaqirdi.

HRW vakilining ma'lum qilishicha, tashkilot adliya vazirligiga o‘z a'zolarini ro‘yxatga olish to‘g‘risida so‘rab joriy yilning 9 fevralida murojaat qilgan. Qonun bo‘yicha bir oy muddat ichida rasmiy javob berilishi kerak bo‘lgani holda rad etish to‘g‘risidagi munosabat 8 may kuni bildirilgan. Human Rights Watch O‘zbekistondagi vakolatxonasi sobiq rahbari Andrea Berg mamlakatni 2007 yilning yozida tark etgan va uning o‘rniga Igor Vorontsov kelgandi. Biroq uning O‘zbekistonda rasman ish boshlash yo‘lidagi harakatlari besamar bo‘lib chiqmoqda.

HRWga ko‘ra, O‘zbekistonda tashkilot ishlashi mumkin, lekin buning uchun jahon hamjamiyatining bosimi kerak. Yevropa Ittifoqining sanktsiyalarni vaqtincha to‘xtatgani xalqaro inson huquqlari tashkiloti tomonidan ro‘yxatga olish to‘g‘risidagi arizaning rad etilishi sababi sifatida keltiradi.